Ambasadorja amerikane në Tiranë, Yuri Kim thotë se kërcënimet ndaj gjyqtarëve dhe prokurorët nuk duhet të pranohen më si normale.
Në një postim në “Twitter”, Kim shprehet se një sjellje e tillë nuk i takon një vendi anëtar të NATO-s.
“Kërcënimet për prokurorët dhe gjyqtarët dhe përpjekjet e tjera për të prishur reformën në drejtësi në Shqipëri, nuk duhet të pranohen më si ‘normale’.
Kjo sjellje nuk i përket një vendi që është në NATO, ka hapur negociatat për anëtarësim ne BE dhe është ulur në Këshillin e Sigurimit të OKB-së.
Për një kohë të gjatë, të pasurit dhe/ose të fuqishmit kanë besuar se janë të paprekshëm.
Tani ata janë të shqetësuar, se mosndëshkueshmërisë së tyre mund t’i vijë fundi.
Ndërsa reforma në drejtësi zbatohet dhe jep gjithnjë e më shumë rezultate, do të bëhet më e qartë dhe më e qartë se askush – ASKUSH – nuk është mbi ligjin.”– shkruan Kim.
Ky koment i saj vjen në një kohë kur SPAK ka bërë me dije se po heton ish-presidentin dhe kryetarin e Partisë së Lirisë Ilir Meta, pas një kallëzimi penal të bërë ndaj tij nga ish-deputeti Halit Valteri. Megjithatë në reagimin e saj, Kim nuk e përmend çështjen, komenti i saj vjen pas zhurmës se krijuar nga lajmi i hetimit dhe reagimeve ndaj kreut të SPAK-ut nga Meta apo përfaqësues të tjerë të politikës.
