Vendosni fjalën kyçe....

INTERVISTA-Kurti: Serbinë e njoh më mirë se Rama. Ballkani i Hapur udhëhiqet nga Beogradi


Kryeministri i Kosovës në një intervistë për emisionin “Çim Peka Live” ka folur idenë e shkëmbimit të territoreve me Serbinë, rolin e Kryeministrit Edi Rama si dhe nismën “Ballkani i Hapur”.

Albin Kurti tha se teza për shkëmbin territoresh ka dështuar dhe se nuk ishte një rast i mirë për Kosovën.

I pyetur se pse Rama e quajti projektin një rast që vjen njëherë në jetë, Kurti tha se e njeh Serbinë më mirë se “Kryeministri i Shqipërisë” duke e konsideruar Beogradin me tendencë sulmuese duke e rrethuar Kosovën me 48 baza sulmi përreth kufirit.

Nuk besoj se ka qenë një rast i mirë për Kosovën, teza e bërë projekt për shkëmbim territorial, dhe shumë mirë që ka dështuar. Serbinë e njoh shumë më mirë se sa kryeministri i Shqipërisë, dhe Serbia i ka 48 baza sulmuese rreth kufirit me Kosovën. Me 50-150 ushtarë të armatosur. 28 prej tyre janë ushtarake dhe 20 janë xhandarmëri. Dhe janë në atë zonën tokësore të sigurisë 5 km, e cila ka qenë e zbrazur deri në gushtin e vitit 2001. E pas gushtit 2001, ata janë futur aty. Unë nuk besoj se do të na sulmojnë këtë javë edhe pse quhen baza sulmuese. Unë e kam rritur buxhetin e vitit 2022 veçanërisht për bujqësinë dhe ushtrinë, 52 % për ushtrinë. Unë nuk i besoj Beogradit edhe kur flet diçka që duket paqedashëse dhe gjithçka që bën, është luftënxitëse”-tha Kurti.

Më tej Kryeministri i Kosovës tha se nisma e Ballkanit të Hapur nuk mund të bëhet nëse nuk është mirë për Kosovën.

Sipas Kurtit “Procesi i Berlinit” udhëhiqet nga Gjermania ndërsa Ballkani i Hapur nga Serbia.

Çdo gjë që nuk është e mirë për Kosovën nuk është e mirë as për Shqipërinë , ç’ka nuk është e mirë për Shqipërinë nuk është e mirë as për Kosovën.

Ne jemi dy shtete por jemi një komb dhe duhet të rrisim bashkëpunimin dhe ndjeshmërinë për njëri-tjetrin. Në ‘Procesin e Berlinit’ udhëheq Gjermania, në ‘Ballkanin e Hapur’ udhëheq Serbia, unë besoj se procesi i Berlinit nën udhëheqjen e kancelarit Scholts është rruga e duhur drejt integrimit europian. Nuk është shpejt por nuk ka rrugë më të mirë dhe mos harroni që Serbia dëshiron që faktorët perëndimorë të mos jenë në një vijë. Serbia dëshiron që as Gjermania të mos pajtohet me Francën dhe as Brukseli më Uashingtonin. Ndërkohë që interesi i shqiptarëve është raporti i mirë trans-atlantik, ne kemi interes sinkronizimin e dyfishtë, sinkronizimin Paris-Berlin dhe Bruksel-Uashington.

Serbia njësoj si Kremlini dëshiron që faktorët perëndimorë të jenë të përçarë. Është gabim që ne shqiptarët provojmë si Serbia të luajmë me dallimet mes faktorëve perëndimorë. Jo! Neve na intereson ajo çfarë është e përbashkët ndërmjet Berlinit-Brukseli-Parisit-Uashingtonit dhe Londrës. E përbashkëta e tyre është perëndimi demokratik dhe ky është interesi i shqiptarëve në dallim nga Beogradi dhe Moska që dëshirojnë të luajnë në dallimet mes tyre për t’i rritur ato dhe për të rënë edhe Nato-ja edhe Bashkimi Europian”-deklaroi Kurti.