Presidenti rus Vladimir Putin nuk është dakord me sugjerimin e homologut të tij bjellorus Alexander Lukashenko për të dhënë “një përgjigje pasqyrë” ndaj fluturimeve të trajnimit të avionëve të NATO-s.
Të shtunën, gjatë takimit të tij me Putinin në Shën Petersburg, Lukashenko ndau shqetësimin që kishte për avionët e SHBA-së dhe NATO-s “që po stërviten për të mbajtur ngarkesa bërthamore”.
Siç shkruan RT, ai i kërkoi kolegut të tij rus “të konsideronte pasqyrimin e përgjigjes për këto gjëra“, ose të paktën të ndihmonte Minskun për të përmirësuar avionët e tij.
Putin iu përgjigj propozimit duke thënë se ndërsa “nuk ka nevojë” për reciprocitet, Rusia dhe Bjellorusia duhet të marrin masa për të garantuar sigurinë e tyre, “si dhe, ndoshta, atë të anëtarëve të tjerë të Organizatës së Traktatit të Sigurisë Kolektive”.
Në këtë kontekst, Putin sugjeroi modernizimin e “një grupi mjaft të madh” të avionëve SU-35 të Bjellorusisë në Rusi dhe fillimin e trajnimit të personelit të fluturimit. Ai gjithashtu u zotua se “brenda disa muajve të ardhshëm” Rusia do t’i dërgojë aleatit të saj sisteme raketore taktike Iskander-M të cilat mund të përdorin si raketat balistike ashtu edhe ato të lundrimit “si në versionet e zakonshme ashtu edhe ato bërthamore”.
Të dy propozimet u mirëpritën nga Lukashenko.
Gjatë takimit Putin e informoi homologun e tij edhe për aftësitë e NATO-s. Ai pretendoi se “amerikanët kanë 200 municione taktike bërthamore në gjashtë vende anëtare evropiane të bllokut të Atlantikut të Veriut”, me 257 avionë, “jo vetëm amerikanë“, të përgatitur për përdorimin e tyre të mundshëm.
Takimi erdhi në ditën kur inteligjenca ukrainase akuzoi Moskën për përpjekje për të “tërhequr” Bjellorusinë në aksionin e saj ushtarak kundër Kievit.
