Presidenti i SHBA-së Joe Biden duhet të ndërpresë takimin e tij të planifikuar me princin saudit Mohammed bin Salman këtë verë, tha shefi i Komitetit të Inteligjencës së Dhomës së Përfaqësuesve, Adam Schiff në emisionin ‘Face the Nation’ të CBS të dielën.
Udhëheqësi saudit ‘duhet të shmanget’ për rolin e tij të dyshuar në vrasjen e gazetarit të Washington Post në vitin 2018, Jamal Khashoggi, tha demokrati nga Kalifornia, duke shtuar ‘Unë nuk do ia shtrëngoja dorën’.
“Ky është dikush që theri një banor amerikan, e preu në copa në mënyrën më të tmerrshme, të paramenduar. Derisa Arabia Saudite të bëjë një ndryshim rrënjësor në aspektin e të drejtave të njeriut, unë nuk do të doja të bëja asgjë me të.” – tha Schiff.
Kongresmeni hodhi poshtë nocionin se Biden duhet të vizitojë Arabinë Saudite në një përpjekje për të bindur vendin udhëheqës të tregut të OPEC-ut për të ndihmuar në uljen e çmimeve të naftës, në vend të kësaj sugjeroi se ai paraqiste një ‘argument bindës’ se pse SHBA duhet të heqë dorë nga karburantet fosile krejtësisht.
Biden kishte këmbëngulur gjatë fushatës së tij presidenciale se do ta kthente Arabinë Saudite në një shtet ‘pariah’, një premtim që së bashku me disa premtime të tjera të fushatës së tij deri më tani nuk ka arritur të realizohet.
Çmimet e benzinës arritën një tjetër mesatare rekord të lartë kombëtare prej 4,85 dollarë për gallon të dielën, sipas Shoqatës Amerikane të Automobilave, dhe janë rritur në mënyrë të qëndrueshme prej muajsh së bashku me inflacionin gati rekord.
Schiff fillimisht ishte një mbështetës entuziast i luftës së koalicionit të udhëhequr nga Arabia Saudite në Jemen, duke lavdëruar administratën e Obamës se kishte ‘marrë vendimin e duhur’ kur mbështeti Riadin për të shkuar në luftë kundër kombit të varfër në 2015.
Shtatë vjet më vonë, me qindra mijëra të vdekur, duke përfshirë dhjetëra mijëra civilë, me miliona në prag të urisë dhe gjendja është përkeqësuar deri në pikën që OKB-ja e quajti atë ‘krizën më të keqe humanitare në botë’. Schiff ka bashkëpropozuar një projektligj për t’i dhënë fund përfshirjes ‘së paautorizuar’ të SHBA-së në luftë.
Arabia Saudite ka mohuar se bin Salman kishte ndonjë lidhje me vdekjen e Khashoggi, duke dënuar veçanërisht raportin e inteligjencës amerikane të vitit 2021 që pretendonte se princi i kurorës kishte ‘miratuar operacionin në Stamboll, Turqi për të kapur ose vrarë’ shkrimtarin. Riadi ka mohuar gjithashtu përfshirjen në ndonjë krim lufte në Jemen.
