Presidenti Meta ka përkujtuar prishjen e Teatrit Kombëtar dy vite më parë nga qeveria. Në një shënim në Facebook, kreu i shtetit shkruan se prishja ishte një akt kriminal e barbar i qeverisë.
Ai vlerësoi artistët, inteletualët e qytetarët për mbrojtjen e pashembullt që i bënë teatrit përkundrejt tradhtisë së ish-liderit të opozitës Basha, arbitratitetit, korrupsionit e dhunës shtetërore.
Meta shkruan më tej se akti kriminal mbetet sot e kësaj dite i pandëshkuar pavarësisht shkeljeve ligjore e kushtetuese.
“Si sot, dy vite më parë, nëpërmjet një akti kriminal në mes të errësirës dhe në kulmin e pandemisë, u shemb barbarisht në zemër të kryeqytetit, godina historike e Teatrit Kombëtar. Mirënjohje për të gjithë artistët jonkonformistë, gazetarët e pavarur, intelektualët dhe qytetarët e shumtë, të cilët edhe pse të tradhëtuar pabesisht nga lidershipi opozitar, u shndërruan në simbole frymëzuese të rezistencës ndaj arbitraritetit, korrupsionit dhe dhunës shtetërore, duke zgjuar ndërgjegjen shoqërore për rrezikun që kërcënon trashëgiminë kulturore kombëtare. Akti kriminal që ende sot mbetet pa përgjegjës për shkeljet ligjore dhe kushtetuese, për shkeljen e Konventave Ndërkombëtare ku vendi aderon, si dhe për falsifikimet e zyrtarëve në të gjitha nivelet, tregon se sa e pavarur është drejtësia shqiptare që për dy vite jo vetëm nuk ka shpallur një fajtor, por as ka dhënë një përgjigje mbi arsyet e emergjencës të shembjes barbare të Teatrit Kombëtar.” – shkruan Meta.
i
