Rimëkëmbja e rublës ruse tregon se sanksionet ndaj Moskës nuk po i shërbejnë qëllimit të tyre, tha të shtunën kryeministri polak Mateusz Morawiecki. Një numër i madh shtetesh, duke përfshirë anëtarët e BE-së, vendosën kufizime ndaj Rusisë pasi ajo sulmoi Ukrainën në fund të shkurtit.
“Më duhet ta them këtë shumë qartë: sanksionet që kemi vendosur deri më tani nuk funksionojnë. Prova më e mirë është kursi i këmbimit të rublës,” tha Morawiecki të shtunën.
“Kursi i këmbimit të rublës, ky test lakmus, është rikthyer në nivelin që ishte përpara agresionit rus kundër Ukrainës. Çfarë do të thotë? Do të thotë se të gjitha masat ekonomike, financiare, buxhetore dhe monetare nuk kanë funksionuar siç kanë dashur disa liderë. Duhet të thuhet me zë të lartë,” shtoi ai, duke folur në një qendër për refugjatët ukrainas në Otwock afër Varshavës.
Polonia ka mbrojtur sanksione më të ashpra kundër Rusisë për veprimet e saj në Ukrainë. Në fillim të kësaj jave, kryeministri postoi në Twitter se ‘sanksionet supozohet të ndalojnë Putinin. Nëse nuk e kanë bërë, do të thotë se nuk janë mjaftueshme të forta’.
Në mars, ndërsa vendet perëndimore filluan të vendosin sanksione gjithëpërfshirëse ndaj Moskës për Ukrainën, rubla ra në nivelet më të ulëta historike prej 132 rubla për dollar dhe 147 rubla për euro.
Megjithatë, deri në fund të marsit, rubla po tregtohej me rreth 85 për dollar dhe 93 për euro, pothuajse të njëjta me normat përpara se Rusia të fillonte fushatën e saj ushtarake. Monedha ruse u rikuperua pas një sërë masash të marra nga Banka Qendrore dhe njoftimit të Moskës se do t’u kërkojë ‘vendeve jomiqësore’ të paguajnë për gazin në rubla.
