Dhjetëra njerëz janë vrarë dhe ndoshta qindra janë plagosur nga sulmet ajrore në Jemen, nga përshkallëzimi i fundit në luftën e koalicionit të udhëhequr nga Arabia Saudite kundër rebelëve Houthi në vendin e shkatërruar nga lufta.
Objektivat e goditura të premten thuhet se përfshinin një burg dhe një aeroport në qytetin verior të Sa’ada, objekte të ndryshme qeveritare dhe një ndërtesë telekomunikacioni në Hodeidah.
Shumë prej viktimave u dërguan me urgjencë në Spitalin Al-Gumhourriiyeh në Sa’ada, ku thuhet se ishin 138 të plagosur dhe 70 të vdekur, sipas grupit Mjekët pa Kufi (MSF).
Al-Gumhourriiyeh është aq i mbingarkuar sa nuk mund të pranojë më pacientë, dhe të paktën dy spitale të tjera në qytet kanë marrë një numër të madh viktimash, tha MSF.
Ka ende shumë trupa në skenën e goditjes më shkatërruese, në burgun në Sa’ada.
“Është e pamundur të dihet se sa njerëz janë vrarë.” – tha Ahmed Mahat, kreu i misionit të MSF në Jemen.
