Moska thuhet se ka filluar riatdhesimin e përfaqësuesve të saj dhe familjeve të tyre në Ukrainë. Në një raport të botuar të hënën nga New York Times, gazeta pohoi se 18 persona, kryesisht fëmijë dhe gra të diplomatëve rusë, u larguan nga Ukraina më 5 janar. 30 persona të tjerë dyshohet se u larguan në dy javët pas kësaj, dhe diplomatë nga dy konsullata të tjera ruse thuhet se i janë këshilluar të përgatiteshin për t’u larguar nga vendi.
Si përgjigje, RT raporton se Ministria e Jashtme ruse ka reaguar duke thënë se “ambasada ruse në Kiev po punon normalisht”, por nuk mohoi ndonjë zvogëlim.
Sipas New York Times, zyrtarë nga SHBA dhe Ukraina konfirmuan se diplomatët rusë ishin larguar nga Kievi.
Raportet për evakuime vijnë pasi Moska akuzohet nga vendet perëndimore për një grumbullim trupash në kufirin me Ukrainën, me qëllimin për të pushtuar vendin në javët dhe muajt e ardhshëm. Kremlini ka mohuar në mënyrë të përsëritur çdo plan për të sulmuar dhe ka sugjeruar se NATO po përdor spektrin e “agresionit rus” si një pretekst për të vendosur më shumë pajisje ushtarake në rajon.
Javën e kaluar, CNN i Amerikës pretendoi se një “grup operativësh” të trajnuar në luftën urbane dhe përdorimin e eksplozivëve ishin dërguar për të “kryer akte sabotimi kundër forcave prokure të Rusisë” për të krijuar një pretekst për ndërhyrje ushtarake në Ukrainë.
Kjo histori, duke cituar burime anonime, i bëri jehonë një deklarate të mëparshme të Këshilltarit të Sigurisë Kombëtare të Shteteve të Bashkuara, Jake Sullivan, i cili pretendoi se inteligjenca amerikane kishte arsye të besonte se Moska po planifikon një skenar ku mund të justifikojë një ndërhyrje ushtarake në Ukrainë.
“Rusia po shtron bazat për të pasur mundësinë e sajimit të një preteksti për një pushtim, duke përfshirë aktivitetet sabotuese dhe operacionet e informacionit, duke akuzuar Ukrainën për përgatitjen e një sulmi të afërt kundër forcave ruse në Ukrainën Lindore.”- shprehej Sullivan.
