Shefi i diplomacisë së Bashkimit Evropian, Josep Borrell, ka reaguar pas vendosjes së sanksioneve të disa serbëve nga Kosova, të cilët, sipas Shteteve të Bashkuara janë pjesë e një grupi të krimit të organizuar.
Në një postim në “Twitter”, Borrell tha se “ky është një hap i rëndësishëm në luftën kundër krimit të organizuar në Ballkanin Perëndimor.”
“Shkatërrimi i rrjeteve kriminale transnacionale kontribuon në sigurinë, stabilitetin dhe përmirëson sundimin e ligjit në mbarë rajonin. BE-ja është plotësisht e angazhuar në arritjen e këtij synimi të përbashkët.” – shkruan Borrell i cili shpërndan njoftimin e Sekretarit Amerikan të Shtetit, Anthony Blinken.
Ditën e djeshme, ai njoftoi se kanë futur në listën e sanksioneve: Millan Radoiçiq, Zvonko dhe Zharko Vesellinoviq, Srgjan Vulloviq, Zhelko dhe Andrija Bojiq dhe Radulle Steviq – të gjithë serbë nga Kosova.
Sipas njoftimit të Departamentit amerikan të Thesarit, Zvonko Vesellinoviq identifikohet si udhëheqës i Grupit të Krimit të Organizuar dhe gjithashtu si një nga figurat më famëkeqe të korrupsionit në Kosovë.
Me futjen e këtyre personave në listë, prona e tyre kryesisht bllokohet dhe qytetarëve amerikanë u ndalohet të bashkëpunojnë me ta.
The designation by the U.S. is an important step in fighting organised crime in the #WesternBalkans
Dismantling transnational criminal networks contributes to security, stability &improves rule of law in the entire region. The EU is fully engaged in pursuing this common objective https://t.co/VJkUpxkqzr— Josep Borrell Fontelles (@JosepBorrellF) December 9, 2021
