Forcat izraelite kanë rikapur dy të burgosurit e fundit palestinezë të arratisur javën e kaluar nga një burg i sigurisë së lartë, tha policia izraelite.
Në një deklaratë, policia tha se dy palestinezët Iham Kamamji dhe Munadil Nafiyat u kapën në qytetin e Jenin.
“Shtëpia ku po qëndronin dy të arratisurit u zbulua nga inteligjenca e dhënë nga shërbimi i brendshëm i sigurisë izraelite, Shin-Bet, dhe ata u arrestuan nga forcat izraelite pa treguar ndonjë rezistencë,” shtoi deklarata.
Grupi palestinez Xhihadi Islamik, nga ana e tij, e mbajti Izraelin përgjegjës për sigurinë e të burgosurve të rikapur.
Në një deklaratë, grupi u zotua të vazhdojë përpjekjet për të çliruar të gjithë të burgosurit palestinezë nga burgjet izraelite dhe bëri thirrje për organizimin e tubimeve në të gjithë territoret e pushtuara palestineze për të treguar mbështetje ndaj familjeve të të burgosurve palestinezë.
Gjashtë të burgosur palestinezë u larguan nga burgu i sigurisë së lartë Gilboa në Izraelin verior më 6 shtator. Katër prej tyre, megjithatë, u kapën nga forcat izraelite javën e kaluar pas një kërkimi në shkallë të gjerë.
Ka rreth 4,850 të burgosur palestinezë në burgjet izraelite, përfshirë 41 gra e 225 fëmijë.