Banka Botërore ka ndaluar financimin për projektet në Afganistan pasi talebanët morën kontrollin e vendit, raporton “BBC”. Ky veprim vjen vetëm disa ditë pasi Fondi Monetar Ndërkombëtar pezulloi pagesat për Afganistanin.
Administrata e Biden gjithashtu ka ngrirë asetet e bankës qendrore të Afganistanit që mbahen në SHBA. “Ne kemi ndalur disbursimet në operacionet tona në Afganistan dhe jemi duke monitoruar dhe vlerësuar nga afër situatën në përputhje me politikat dhe procedurat tona të brendshme”, tha një zëdhënës i Bankës Botërore për BBC.
“Ne do të vazhdojmë të konsultohemi ngushtë me bashkësinë ndërkombëtare dhe partnerët e zhvillimit. Së bashku me partnerët tanë ne jemi duke eksploruar mënyra se si mund të mbetemi të angazhuar për të ruajtur fitimet e zhvillimit të fituara me vështirësi dhe për të vazhduar të mbështesim njerëzit e Afganistanit.”
Çfarë do të ndodhë më tej me ekonominë e Afganistanit?
Që nga viti 2002, institucioni financiar me seli në Uashington ka angazhuar më shumë se 5.3 miliardë dollarë për projektet e rindërtimit dhe zhvillimit në Afganistan.
Të premten, Banka Botërore i tha stafit se ekipi i saj me qendër në Kabul dhe familjet e tyre ishin evakuuar në mënyrë të sigurtë nga Afganistani në Pakistan.
Vendimi i Bankës Botërore për të pezulluar pagesat për Afganistanin është goditja e fundit financiare ndaj qeverisë së re të vendit.
Javën e kaluar, FMN-ja njoftoi se Afganistani nuk do të jetë më në gjendje të ketë qasje në burimet e huadhënësit global.
Një zëdhënës i FMN -së tha se kjo ishte për shkak të “mungesës së qartësisë brenda bashkësisë ndërkombëtare” mbi njohjen e një qeverie në Afganistan.
Rreth 440 milionë dollarë rezerva të reja monetare ishin vënë në dispozicion të vendit nga 23 gushti.
Gjithashtu në ditët pasi talebanët morën kontrollin e Kabulit, Shtëpia e Bardhë tha se çdo pasuri që banka qendrore e Afganistanit ka në SHBA nuk do të vihej në dispozicion të talebanëve. Afghanistan Bank ka afërsisht 9 miliardë dollar rezerva, shumica e të cilave mbahen në SHBA.
