Policia ka zbuluar detajet nga nisja e operacionit “Bregdeti Ynë” për lirimin e hapësirave të zëna pa leje në Golem të Kavajës.
Uniformat blu bëjnë me dije se janë evidentuar 11 parcela pa leje dhe janë hequr 550 shezlongë e 280 çadra.
“Në kuadër të operacionit ‘Bregdeti ynë’, nis faza e dytë e operacionit për lirimin e hapsirave bregdetare të zaptuara në mënyrë të kundraligjshme me shezlongë e çadra.
Në zbatim të planit operacional të hartuar nga Drejtoria e Përgjithshme e Policisë së Shtetit ‘Për kontrollin e vijës bregdetare në drejtim të zaptimit të vijës bregdetare nga subjekte apo persona të cilët nuk janë konfirmuar nga e-Albania’, Task-Forca e veçantë në përbërje të së cilës ka 2 grupe FNSH, 2 grupe të Forcës së Posaçme “Shq’iponja’, shërbime të Komisariatit të Policisë Kavajë, Policia Bashkiake dhe struktura të mjedisit të Policisë Bashkiake, prej mëngjesit të sotëm ka nisur kontrollet dhe verifikimet në territorin e plazhit në Golem.
Kontrolli ka filluar nga Përroi Agait në drejtim të Karpenit, dhe kontrollet do vazhdojnë në të gjithë vijën bregdetare.
Si rezultat i kontrolleve janë evidentuar 11 parcela pa leje ku janë hequr rreth 550 shezlongë dhe rreth 280 çadra.”- thuhet në njoftimin e Policisë.
Ky operacion po vijon pa problem sipas policisë.
