Ky është viti i dytë akademik që mbyllet në distancë. E mesa duket Universiteti Publik i Tiranës, me numrin më të lartë të studentëve nuk ka ndërmend të konsiderojë kërkesën e studentëve për ulje tarife.
Studentët do ta paguajnë të plotë tarifën e studimeve universitare megjithëse i gjithë viti akademik universitar ishte online.
Kështu ka deklaruar ditën e djeshme, Rektori i Universiteti të Tiranës Artan Hoxha duke e konsideruar heqjen e tarifës si një gjë të pamundur.
Sipas tij, nuk është tarifa ajo që i rëndon studentët dhe familjet e tyre. Por shpenzimet për qëndrimin e studentëve nga rrethet në kryeqytet. Sipas rektorit, familjet e studentëve kanë përfituar në këtë mes, nga zhvillimi i mësimit online.
“Sipas të dhënave tona, 70% e studentëve vijnë nga rrethet, 30% banojnë në kryeqytet. Do të thotë që nuk janë tarifat ato që dëmtojnë ekonominë familjare, por pjesëmarrja e studentit në universitet dhe jo në distancë.”-thotë rektori, i cili shton se edhe semestri i dytë, njësoj si i pari do të mbyllet online, pavarësisht lejes nga komiteti teknik i ekspertëve për të hapur auditoret. Edhe ky, një argument shtesë se financat e studentëve nuk do të cenohen.
“Në përgjithësi provimet e semestrit të dytë dhe përmbyllja e këtij viti akademik do të bëhet online, me përjashtime të vogla sipas degëve dhe programeve ku prezenca është e domosdoshme. Kjo do të thotë që ne nuk do t’i ngarkojmë familjet e studentëve me kosto shtesë. Do të mundohemi që programin mësimor ta përfundojmë me nivelin sa më të lartë të realizimit të tij”.
E njëjta gjë nuk ndodh në Prishtinë, ku kostoja vjetore e shpenzimeve për studentët në vitin pandemik është vendosur të zerohet.
