m
Pas një dite incidentesh të lidhura me fushatën zgjedhore, ambasadorja e SHBA-ve Yuri Kim ka takuar prokurorin e Përgjithshëm Olsian Çela, drejtorin e Policisë Ardi Veliu dhe kreun e SPAK-ut Arben Kraja.
Ajo thotë se mesazhi që ka përcjellë në këto takime, është se ata persona që shkelin ligjin dhe pengojnë të drejtën e qytetarëve për të votuar të lirë dhe në paqe duhet të ndiqen.
“Unë u takova me Prokurorin e Përgjithshëm Çela tani, do të takohem së shpejti me shefin e SPAK, Kraja, u takova dje me Drejtorin e Përgjithshëm të Policisë Veliu. Mesazhi i Shteteve të Bashkuara të Amerikës: Ata që shkelin ligjin dhe pengojnë të drejtën e qytetarëve për të votuar të lirë dhe në paqe duhet të ndiqen plotësisht. Asnjë trajtim i veçantë. Pa përjashtime. Askush nuk është mbi ligjin.”– deklaroi ambasadorja Kim.
Ky mesazh i fortë vjen një ditë pas një sërë incidentesh të ndodhura në Tiranë (rasti i shpërndarjes së ushqimeve në Vaqarr), Vlorë (të shtënat me armë në një lokal), Pocem (dhuna ndaj anëtarit të LSI-së) dhe Elbasan (ku pati edhe humbje jete). Pas incidentit në Elbasan, ambasadorja u kishte bërë thirrje për vetëpërmbajtje palëve politike.
