Filiali i gjigantit suedez të shitjes me pakicë Ikea është hedhur në gjyq në Francë. Kompania, së bashku me shumë ish-shefat e saj, po përballen me akuza për drejtimin e një skeme të ndërlikuar spiunimi për të vëzhguar punonjësit.
Gjyqi filloi në një gjykatë në Versajë, në jugperëndim të Parisit, të hënën pas gati një dekade të gjatë hetimi.
Prokurorët pretendojnë se kompania ka ngritur një “sistem spiunimi” të madh në operacionet e saj në vend, duke mbledhur ilegalisht të dhëna për punonjësit ekzistues dhe kandidatë e mundshëm, duke përfshirë informacione të tilla të ndjeshme si regjistrat penalë.
Akuzat përfshijnë mbledhjen e paligjshme të informacionit personal, marrjen e informacionit personal të mbledhur në mënyrë të paligjshme dhe shkeljen e konfidencialitetit profesional.
Disa prej akuzave dënohen deri në 10 vjet burg. Përveç të gjithë kompanisë që po gjykohet si një njësi e korporatës, 15 individë janë ndjekur penalisht gjithashtu.
Lista përfshin ish-menaxherë të dyqaneve dhe drejtues të lartë, përkatësisht ish-CEO-n, Stefan Vanoverbeke dhe paraardhësin e tij, Jean-Louis Baillot. Ish-drejtori i menaxhimit të rrezikut të Ikea France, Jean-Francois Paris, besohet të jetë organizatori i tërë skemës.
Përveç ish-figurave të mëdha të Ikeas, grupi i ndjekur penalisht përfshin gjithashtu katër oficerë policie të cilët dyshohet se i kanë dhënë kompanisë informacione konfidenciale.
