Mëngjesin e sotëm Forcat Speciale të Renea, Forca e Posaçme Operacionale në Drejtorinë e Përgjithshme të Policisë së Shtetit, policia e Lezhës dhe e Kurbinit kanë kryer kontrolle të befasishme në disa ambiente për kapjen e personave në kërkim, të atyre që mbajnë armë zjarri dhe lëndë narkotike.
Ndërkohë janë publikuar dhe pamjet nga ky operacion, ku mbeti i arrestuar një 30-vjeçar, Can Karriqi.
Siç shihet dhe nga pamjet e operacionit, policia ka hyrë në disa biznese, hotele e lokale, ku disa persona janë shtrirë në tokë me duart e prangosura pas, ose të mbështetura pas murit.
Policia thotë në një njoftim për mediet, se gjatë kontrolleve janë sekuestruar një armë zjarri pistoletë dhe targa të vjedhura që u përkisnin automjeteve të tjera. Dyshimet janë se këto targa e armë do të përdoreshin për të kryer ngjarje kriminale.
Gjatë këtij operacioni, u shoqëruan për verifikim edhe 5 persona me precedent të mëparshëm penal.
NJOFTIMI I POLICISË
Në zbatim të planit të masave për mbajtjen nën kontroll të situatës kriminale, kapjen e personave në kërkim, atyre që qarkullojnë me armë zjarri apo lëndë narkotike, si dhe bazuar në informacionet e ardhura nga qytetarët në ‘Komisariatin Dixhital’, Forcat Speciale Renea, Forca e Posaçme Operacionale në DPPSH, DVP Lezhë dhe Komisariati i Policisë Kurbin, ushtruan kontrolle të befasishme në disa lokale dhe ambiente në Milot, Kurbin e Lezhë.
Si rezultat i kontrolleve , në Fushë-Milot, në ambientet e jashtme të një kompleksi u gjet dhe u bllokua në cilësinë e provës materiale një armë zjarri pistoletë “GLOCK”, me një krehër me 14 fishekë, që i përkiste shtetasit Can Karriqi, 30 vjeç, të cilit gjatë kontrollit fizik në xhepin e xhupit iu gjet një krehër i markës “GLOCK”, me 16 fishekë të kalibrit 9 mm pa leje.
Gjithashtu ky shtetas dyshohet se është autori i vjedhjes se targave të shpallura në kërkim nga DVP Shkodër të vjedhura më datë 19.09.2019, të cilat u gjetën brenda ambienteve rrethuese të objektit.
Në përfundim të veprimeve u bë arrestimi në flagrancë i 30-vjeçarit Can Karriqi, për veprat penale “Armëmbajtja pa leje ” dhe “Vjedhja” dhe materialet i kaluan Prokurorisë së Rrethit Gjyqësor Kurbin, për veprime të mëtejshme.
Kontrollet kanë vijuar edhe në disa ambiente të tjera në qarkun e Lezhës, ku gjatë kontrolleve janë shoqëruar për verifikim disa persona me precedent të mëparshëm penal.
