Vendosni fjalën kyçe....

Meksika do të autorizojë vaksinën ruse “Sputnik V” brenda ditësh


Në ditët në vijim, rregullatorët meksikanë pritet t’i japin dritën jeshille vaksinës ‘Sputnik V’ të Rusisë për përdorim emergjent.

Të paktën kështu ka deklaruar zëvendës ministri i shëndetësisë Hugo Lopez-Gatell, shkruan RT.

Njoftimi i tij pasoi një rekomandim nga një panel ekspertësh në Komisionin e Meksikës për Mbrojtjen kundër Rreziqeve Shëndetësore në favor të vaksinës ruse, duke hapur rrugën për autorizimin e plotë “brenda ditësh”.

Përparimi në marrëveshjen e vaksinave me Moskën vjen disa ditë pasi presidenti meksikan Andres Manuel Lopez Obrador doli pozitiv për koronavirusin. Lidhur me gjendjen e presidentit, zv.ministri tha se ai kishte dhimbje koke dhe ethe, por që në përgjithësi “po ia dilte mirë”.

Obrador ka diskutuar për dërgesat e vaksinave me homologun e tij rus, presidentin Vladimir Putin, gjatë një telefonate të hënën.

Obrador tha se Putini pranoi të furnizonte Meksikën me 24 milion doza të vaksinës Sputnik V gjatë dy muajve të ardhshëm, të cilat do të shpërndahen së bashku me dozat e zhvilluara nga CanSino Biologics të Kinës, si dhe firmat farmaceutike Pfizer dhe AstraZeneca.

Vaksina ruse, nëse miratohet, ka të ngjarë të bëhet vaksina më e përdorur gjerësisht e Meksikës, veçanërisht pasi Pfizer papritmas i zvogëloi dërgesat e saj këtë muaj.