Vendosni fjalën kyçe....

Era dëmton linjat, mbeten pa energji elektrike 3 mijë banorë në Skrapar e Poliçan


Rreth 3 mijë banorë në Skrapar, Poliçan e Urë Vajgurore kanë mbetur pa energji elektrike që prej mesditës së djeshme. Shkak për këtë është bërë dëmtimi i linjave për shkak të motit të paqëndrueshëm e erërave të forta.

Sipas OSHEE-së, punonjësit e saj kanë dalë në terren e po punojnë për riparimin e defekteve sa më shpejt që të jetë e mundur.

Njoftimi i OSHEE-së

2951 abonentë në qytetet: Skrapar, Poliçan e Urë-Vajgurore janë pa energji elektrike që prej mesditës së sotme. Kjo situatë e rënduar është krijuar si pasojë e motit të keq dhe erërave të forta, që kanë dëmtuar mjaft kabina elektrike. Me probleme paraqiten:

-10 Kabina elektrike që janë jashtë pune në Fiderin Tomoricë në Nën/stacionin e Çorovodës, nga i cili furnuzohen me energji elektrike 160 abonentë.

-Fideri.2/10KV (fshat) në Nën/stacionin Çiflik,i cili është i stakuar pjesërisht dhe ku 7 Kabina që furnizojnë 160 abonentë janë jashtë pune.

-Fideri Mbrakull në Nën/Stacionin e Poliçanit është i stakuar plotësisht dhe pa energji elektrike janë 1542 abonentë të fshatrave: Mbrakull, Kapinovë, Lybeshë dhe Vërtop.

-Fideri Potom në Nën/Stacionin e Çorovodës është i stakuar plotësisht dhe pa energji elektrike janë 1086 abonentë të fshatrave: Çepan,Backë,Kreshovë,Lepan, Leshnje dhe Gjorgovë.

Mësohet se,ekipet e OSHEE-së kanë dalë në terren dhe po punojnë për riparimin e difekteve dhe normalizimin e situatës së krijuar.

Burimet zyrtare nga institucioni i Prefektit të qarkut bëjnë me dije se, është ndjekur me vëmendje situata e furnizimit me energji elektrike në Sektorët jetikë në situatën e emergjencës mjekësore COVID-19,ku Spitalet, Qëndrat Shëndetësore dhe Poliklinika janë të gjitha me energji elektrike.

Prefektja e Qarkut Berat, Valbona Zylyftari, bën me dije se, dhe dhe sot janë zhvilluar mbledhjet e Komisionit të Mbrojtjes Civile ku ju është kërkuar anëtarëve të jenë të kujdesshem në vlerësimin dhe menaxhimin e riskut, me qëllim parandalimin dhe shmangien e çdo premise për ngjarje.