Në nisje të seancës së sotme plenare në Kuvend, deputeti Kujtim Gjuzi mori fjalën duke akuzuar kryeparlamentarin Gramoz Ruçi, se po shkel Aktin Normativ.
Kjo sepse nuk po zbatohet masa e vendosur nga Komiteti Teknik i Ekspertëve për të mos lejuar grumbullimet mbi 10 persona.
Gjuzi tha se në sallën e Kuvendit janë 120 deputetë, krejtësisht në kundërshtim me këtë rregull.
Ai ndërsa nxori dhe një kasetë, në të cilën tha se shfaqej drejtoresha e Spitalit të Krujës, që largon mjekun nga spitali, ndonëse aty ka mungesa.
“Nuk keni zbatuar aktin normativ. Nuk lejohet grumbullimi i më shumë se 10 personave, ne jemi 120. Ju sjell në vëmendje se këtu kam një kasetë të drejtorit të spitalit, që iu kërkon mjekëve t’i cojnë pacientët … Do ia vë ministres sot në dispozicion këtë kasetë. Mjeku gjinekolog Leonard Spaho largohet nga Spitali i Krujës, kur në spital ka dy mungesa. Pse duhet të ndodhë kjo?”– deklaroi Gjuzi.
Kreu i Kuvendit u përgjigj duke thënë se në vendimin e Komitetit të Ekspertëve nuk është përfshirë Kuvendi.
Ai theksoi se Kuvendi do vijojë punën duke zbatuar tre kërkesa: të ruajë të gjitha masat, të mbahen maskat dhe të ulet koha e qëndrimit në sallë në seanca plenare.
