Dy persona të tjerë janë arrestuar në Elbasan lidhur me vrasjen e Florian Lamçes një muaj më parë. Në pranga kanë rënë 33-vjeçari me iniciale M.M. dhe 40-vjeçari me iniciale A.L.
Ata akuzohen nga policia për moskallëzim krimi si dhe deklarim të rremë. Lamçe u vra në datën 30 korrik ndërsa për ngjarjen janë arrestuar dhëndri i ish-kryebashkiakut të Elbasait, Sokol Sanxhatari dhe shoku i tij, Adriano Hajdari.
Njoftimi
Vijon intensivisht puna hetimore për zbardhjen dhe dokumentimin e plotë ligjor të ngjarjeve kriminale të nodhura më parë. Shkon në 4 numri i të arrestuarve për vrasjen e shtetasit F.L.
Vihen në pranga dy shtetas për moskallëzim krimi dhe veprime që pengojnë zbulimin e së vërtetës.
Strukturat e DVP Elbasan nën drejtimin e Prokurorisë së Rrethit Gjyqësor Elbasan, kanë vijuar intensivisht punën për zbardhjen dhe dokumentimin ligjor të ngjarjes kriminale të ndodhura më parë.
Në vijim të hetimeve të thelluara në kuadër të proçedimit penal në lidhje me ngjarjen e datës 30.07.2020, ku në ambientet e një bar kafeje të qytetit të Elbasanit mbeti i vrarë me sende të forta shtetasi F. L. ( Sh.) është bërë e mundur dokumentimi i veprimtarisë kriminale kapja dhe ndalimi i shtetasve :
M.M., 33 vjeç dhe A.L., 40 vjeç, të dy banues në Elbasan.
Kapja dhe ndalimi i tyre u bë pasi Gjykata e Shkallës Parë Elbasan, ka vendosur për këta shtetas masën e sigurisë “Arrest me burg”, për veprat penale “Moskallëzim të krimit”, “Veprime që pengojnë zbulimin e të vërtetës” në ngarkim të shtetasit M.M dhe “Moskallëzim të krimit”, “Veprime që pengojnë zbulimin e të vërtetës” dhe “Deklarim i rremë përpara oficerit të policisë gjyqësore” në ngarkim të shtetasit A.L.
Materialet hetimore i kaluan Prokurorisë pranë Gjykatës së Shkallës parë Elbasan, për veprimet e mëtejshme.
