Një nëntëvjeçar nga Kenia që ka ndërtuar një makinë nga druri për larjen e duarve për të frenuar përhapjen e koronavirusit, ka marrë këtë të hënë një çmim presidencial.
CNN shkruan se Stephen Wamukota nga Bungoma County në Kenian Perëndimore, ishte më i riu prej 68 personave që kanë pranuar çmimin nga presidenti Uhuru Kenyatta.
Wamukota ka punuar një makinë gjysmë automatike për të ndihmuar në frenimin e përhapjes së COVID-19 në Kenia, që deri më tani ka raportuar mbi 2000 raste me koronavirus.
Patrick Amoth, i cili është drejtori i përgjithshëm për Ministrinë e Shëndetësisë në Kenia dhe Wachira Waruru, drejtoreshë e Royal Media Service, gjithashtu morën çmimin presidencial.
Babai i Wamukotas, James, ka thënë për CNN se djalit të tij i lindi ideja për të punuar makinerinë, pasi mësoi në një kanal televiziv se si duhej të mbrohej nga koronavirusi.
“Herën e parë kur presidenti lajmëroi për infeksionin në vend, është thënë se secili duhet të lajë duart rregullisht për të parandaluar përhapjen e virusit. Djali im më tha se ka përgatitur një strukturë për të ndihmuar në larjen e duarve”, tha ai.
Ëamukota përdori dru dhe një rezervuar të vogël të ujit për të krijuar makinën për larjen e duarve.
James, i cili punon si elektricist, ka treguar se një ditë kur u kthye nga puna, pa se djali i tij kishte ndërtuar makinën me disa copa druri, të cilat ai kishte qenë duke i ruajtur për të ndërtuar një dritare.
“Pashë që ajo që kishte ndërtuar nuk ishte e qëndrueshme, kështu që e ndihmova për disa riparime. Nuk doja që makina të shkatërrohej” – tregon babai krenar.
Makina e thjeshtë për larjen e duarve ka dy pedale, njërën për të lëshuar sapun të lëngët e tjetrën për të lëshuar ujin.
Ajo u lejon përdoruesve që të shtypin pedalet pa prekur sipërfaqen me duar, duke zvogëluar mundësinë e infektimit. James thotë se ideja është ndikuar edhe nga mësimet e shkollës.
Pas kësaj shpikjeje, djalit 9-vjeçar i është premtuar një bursë për shkollë fillore dhe të mesme. Wamukota tregon se dëshiron të bëhet inxhinier.
https://www.youtube.com/watch?v=7ck4T9dzrsA
