Kryetari i Partisë Demokratike Lulzim Basha nëpërmjet një video-prezantimi ka shpalosur planin me pika për daljen nga emergjenca e krijuar për shkak të Covid-19.
Në planin 5 pikës, kryedemokrati kërkon më shumë testime, gjurmim të kontakteve dhe mbështetje për stafin mjekësor në rrafshin e përballjes në vijën e parë, ndërsa për ekonominë ka kërkuar një tranzicion për ekonominë në lidhje me përshtatjen e situatës dhe marrjen e masave të distancimit.
Plani me 5 pika:
1.Sa më shumë testime
Sa më shumë persona të testuar, aq më shpejt identifikohen të prekurit dhe ndalohet përhapja e COVID-19. Bllokimi i ekonomisë dhe popullsia në karantinë kanë kosto shumë më të lartë sesa testimi i qytetarëve.
2.Gjurmimi i burimit dhe i kontakteve
Duhet bërë gjurmim i plotë i burimit dhe i kontakteve të të prekurit. Testimi i mjekëve, policëve e personave në vijën e parë. Kjo kërkon burime njerëzore, trajnimin dhe përdorimin e kapaciteteve lokale shëndetësore.
3.Mbështetje për Shëndetësinë
Të sigurojmë mjetet dhe pajisjet për personelin shëndetësor. Të garantojmë që kapacitetet tona shëndetësore të përballojnë fluksin e personave që kanë nevojë për trajtim.
4.Matjet dhe menaxhimi i situatës
Duhet një sistem i saktë i matjes së impaktit që kanë masat e marra.
Nëse ne e dimë çfarë impakti kanë ato – ulin, mbajnë konstant apo rrisin numrin e të infektuarve -atëherë do të kemi mundësi të reagojmë menjëherë në menaxhimin e situatës, duke i shtrënguar apo lehtësuar më shumë masat e marra.
5.Tranzicioni drejt hapjes së ekonomisë
Rifillimi kërkon përshtatjen me realitetin e ri. Qytetarët dhe bizneset do duhet të mësohen të funksionojnë në kushtet e distancës 1,5 m.
Sa më shpejt të adoptohet kjo mënyrë e re aq më shpejt mund të rifillojë ekonomia dhe të reduktohet karantina. Qeveria duhet të mbështesë me fonde dhe lehtësira mënyrën e re të funksionimit të ekonomisë.
