Një ditë pas arrestimit mësohet dëshmia që ka dhënë botuesi Henri Çili para policisë. Sipas Report Tv, Çili ka mohuar të ketë pasur dijeni për gjithçka që akuzohet nga organi i Prokurorisë.
Botuesi i njohur i është nënshtruar seancave pyetësore në orët e vona të mbasdites së djeshme tek oficerët e Policisë Gjyqësore.
Ai është shprehur se s’ka kryer asnjë shkelje për akuzat që i bëhen dhe se gjithçka sipas tij është tërësisht e manipuluar dhe do t’i kundërshtojë në momentin e duhur “me prova dhe fakte”.
Çili, i cili u vu dje në pranga për shkak se dyshohet se ka ndërhyrë në sistemin e drejtësisë për të lehtësuar dënimin e formës së prerë nga Apeli për dy vëllezërit nga Lazarati, Alban dhe Arbjon Aliko.
Këto dy persona akuzohen për vrasjen e efektivit të RENEA-s Ibrahim Basha, në qershor të vitit 2015 në Lazarat.
Çilit mësohet se do t’i komunikohet masa e arrestit në orët e mesditës së nesërme në Gjykatën e Faktit në Përmet.
