Numri i rasteve të koronavirusit të ri në të gjithë botën, ka tejkaluar atë të epidemisë së Sars, e cila u përhap në më shumë se 20 vende në vitin 2003.
Kishte rreth 8,100 raste të koronavirusit Sars të raportuara gjatë asaj periudhë. Por të paktën 9,962 njerëz janë infektuar me koronavirusin e ri, i cili u shfaq në Kinë në dhjetor.
Siç shkruan BBC, numri i të vdekurve është 213 – të gjithë në Kinë. Kjo është një shifër shumë më e ulët se 774 personat që humbën jetën nga Sars.
Të enjten, Organizata Botërore e Shëndetit shpalli një emergjencë globale shëndetësore për shkak të shpërthimit të virusit. Sipas OBSH-së, jashtë Kinës janë regjistruar 98 raste me virus, por asnjë nuk ka humbur jetën.
Të Premten, dy raste të virusit u konfirmuan për herë të parë në Mbretërinë e Bashkuar. Shumica e rasteve ndërkombëtare kanë qenë tek njerëzit nga qyteti kinez Ëuhan në provincën Hubei, nga origjina e virusit.
Por në tetë raste, në Gjermani, Japoni, Vietnam dhe Shtetet e Bashkuara – pacientët ishin infektuar nga njerëz që kishin udhëtuar për në Kinë.
Krahasimi me Sarsin?
Virusi Sars, i cili ishte gjithashtu një lloj koronavirusi që kishte origjinën në Kinë, u përhap në 26 vende në fillim të viteve 2000.
Virusi i ri është përhapur në më pak vende por më shumë njerëz janë infektuar globalisht. Megjithatë ka rezultuar në më pak vdekje.
Të mërkurën, numri i çështjeve të konfirmuara brenda Kinës e tejkaloi epideminë Sars. Virusi Sars gjithashtu vlerësohej se i kushtoi ekonomisë globale më shumë se 30 miliardë dollarë.
Por ekonomistët kanë thënë që koronavirusi i ri mund të ketë një ndikim edhe më të madh në ekonominë botërore. Koronavirusi i ri ka detyruar ndërmarrjet globale, përfshirë gjigandët e teknologjisë, prodhuesit e makinave dhe shitësit me pakicë të mbyllin përkohësisht pikat e tyre në Kinë.
Kina u kritikua gjithashtu nga Kombet e Bashkuara për fshehjen e shkallës së shpërthimit origjinal të Sars. Por është lavdëruar për përgjigjen ndaj virusit të fundit me masa të ashpra, duke përfshirë në mënyrë efektive vendosjen në karantinë të miliona banorëve në qytete.
