Pas kërcënimeve nga Irani se mund të sulmojë Izraelin, ka reaguar kryeministri izraelit Benjamin Netanyahu.
Siç shkruan Reuters, ai paralajmëroi se vendi i tij do të sulmonte fort kundër kujtdo që e sulmon atë.
“Kushdo që përpiqet të na sulmojë, do të marrë goditjen më të fortë”– tha Netanyahu në Jeruzalem.
Netanyahu përsëriti mbështetjen e tij ndaj SHBA-së për vrasjen e komandantit ushtarak iranian, Qassem Soleimani. Ai tha se Izraeli “qëndron plotësisht” përkrah vendimit të Presidentit të SHBA-së dhe shtoi se Trump duhet të urohet që veproi “me shpejtësi, guxim dhe vendosmëri”.
Irani më herët ka kërcënuar se do të bombardojë Izraelin dhe Dubain nëse Shtetet e Bashkuara hakmarren për sulmin në dy bazat ajrore amerikane në Irak.
“Ne po paralajmërojmë të gjithë aleatët amerikanë, të cilët i dhanë bazat e tyre ushtrisë së saj terroriste, se çdo territor që është pika fillestare e veprimeve agresive kundër Iranit do të jetë në shënjestër”– tha Garda Revolucionare e Iranit.
Një tjetër kanal televiziv i Gardës gjithashtu kërcënoi të bombardojë Dubain dhe Haifa-n në Izrael. Teherani hodhi sot rreth 15 raketa balistike në dy baza ajrore që strehojnë trupat amerikane pas mesnatës. Televizioni shtetëror iranian tha se sulmi ishte në shenjë hakmarrjeje për vrasjen e Gjeneralit të Gardës Revolucionare, Qassem Soleimani.
