Ka patur një përplasje sot mes grave protestuese dhe Policisë së Shtetit, në protestën që po mbahet para një hoteli ku po zhvillohet një aktivitet i OSBE-së.
Efektivët e Policisë i kanë kërkuar grave protestuese të largohen. Është formuar kordoni policor i cili nuk i lejon më gratë të afrohen pranë ambienteve të hotelit. Efektivët i kanë shtyrë gratë drejt trotuarit, çka ka sjellë dhe revoltimin e tyre.
“Mesazhin kemi ardhur t’ja sjellim këtij, jo trotuarit”, i tha një prej protestueseve një efektivi.
“Ne kemi ardhur për të protestuar në mënyrë paqësore për largimin e Borchardt-it nga Shqipëria. Ai duhet të shpallet person non grata. Borchardt me kompani i mbron Edi Rama sepse ndan lekët me ta. Prandaj ka thirr sot gjithë Policinë e Shtetit për të ushtruar dhunë te gratë e Unazës së Re dhe te gratë e gjithë Shqipërisë.”, tha një tjetër protestuese.
Gratë e Astirit protestuan për rreth një orë për të kërkuar largimin e ambasadorit Bendt Borchardt, i cili një javë më parë i fyeu duke u treguar gishtin e mesit./Hashtag.al
