Takimi mes miliarderit George Soros dhe kryeministrit pakistanez, Imran Khan, ka shkaktuar jo pak polemika në vendin aziatik, pasi partia islamike e pa atë si një “provë” të lidhjeve të tij me hebrenjtë dhe u zotua ta rrëzojë qeverinë.
“Luftën” ndaj Khan e ka paralajmëruar lideri i partisë politike islamike Jamiat Ulema-e-Islam Fazl (JUI-F), Fazlur Rehman, i cili gjithashtu udhëheq një aleancë të pesë partive të krahut të djathtë dhe të linjës së ashpër, të njohur si Muttahida Majlis-e-Amal (MMA).
Rehman njoftoi një protestë të madhe, të quajtur “Marshi i Lirisë”, e cila do të zhvillohet në 27 tetor, duke paralajmëruar autoritetet kundër çdo përpjekjeje për ta ndërprerë atë dhe duke siguruar përkrahësit e tij se “lufta” do të vazhdojë derisa qeveria të bjerë.
MMA, si dhe partitë e tjera të opozitës, kanë akuzuar vazhdimisht Khan për manipulim të zgjedhjeve të përgjithshme të vitit të kaluar dhe duke i kërkuar atij që të tërhiqet.
“Qeveria aktuale është rezultat i zgjedhjeve të rreme dhe rezultateve të rreme,” tha Rehman gjatë një konference për shtyp.
Ndërsa pretendimet e mashtrimit elektoral kanë qenë në tryezën e opozitës për mjaft kohë, fija e fundit që i dha zjarr reagimit opozitar ishte një takim midis Khan dhe themeluesit të Fondacionit të Shoqërisë së Hapur, miliarderi George Soros në fund të shtatorit.