Kreu i Partisë Demokratike, Basha, ka deklaruar se kandidatët e partisë që drejton në zgjedhje do bëhen sipas parimit një anëtar, një votë.
Në një deklaratë për mediat nga selia blu, Basha theksoi se procesi i hapjes së PD-së po vijon. Ndërsa shtoi se nuk do ketë zgjedhje me Ramën kryeministër.
“Kusht i panegociueshëm i opozitës së bashkuar për të hyrë në zgjedhje është largimi i Edi Ramës si kryeministër. Duhet qeveri tranzitore, e cila do të plotësojë kushtet për të cilat do të keni më shumë informacion në ditët në vijim.” – tha Basha.
Basha foli edhe për platformën e paraqitur nga partitë aleate duke theksuar se pikat e paraqitura janë pjesë e programit të PD-së.
“Nuk ka asnjë mospërputhje midis qëndrimeve të PD-së dhe gjithë koalicionit tonë. Një pjesë e mirë e pikave që aleatët kanë shpalosur sot janë edhe pikat e programit tonë, pra ka një përputhje totale ndaj të jeni të sigurt se koalicioni opozitar po vepron me bashkëpunim, mirëkuptim dhe sinergji të plotë për të ecur përpara.” – shtoi Basha.
