Të tjera detaje kanë dalë në dritë lidhur me aksidentin që ndodhi një ditë më parë, në aksin kombëtar Korçë-Pogradec, ku dy të moshuarit Sami dhe Vjollca Shaholli humbën jetën.
Mësohet se aksidenti ka ndodhur vetëm pak metra larg shtëpisë së dhëndrit të të moshuarve, ku kishin shkuar për të vizituar vajzën e tyre.
Aksidenti ka ndodhur rreth orës 17:30, ku çifti u përplas nga një makinë “Benz”, tip fuoristradë, në afërsi të fshatit Pocestë.
Dy të moshuarit nga fshati Voskop, 70 dhe 63 vjeç, kanë tentuar të kalojnë nga njëri krah i rrugës në tjetrin, kur janë goditur nga fuoristrada me targa AA 244 NE e drejtuar nga shtetasi Sotir Nikolla, 63 vjeç, i cili lëvizte nga Korça në drejtim të Pogradecit.
Çifti i të moshuarve është transportuar në spital, por kanë ndërruar jetë sapo kanë mbërritur atje.
“Më datë 04.12.2018, në orën 17:26, jemi njoftuar se në aksin rrugor Korçë-Maliq, në afërsi të fshatit Pocestë, shtetasi S.N., 63 vjeç, duke drejtuar mjetin tip ‘Benz’ ka aksidentuar 2 shtetas, (një burrë dhe një grua) kalimtarë në rrugë, të cilët janë transportuar në Spitalin e Korçës, ku edhe kanë ndërruar jetë. Drejtuesi i mjetit ndodhet i shoqëruar në Komisariat për veprime të mëtejshme procedurale. Grupi hetimor po punon për zbardhjen e rrethanave të ngjarjes”, bënte me dije dje Policia.
Ndërkohë sot, policia njofton se e ka arrestuar drejtuesin e fouristradës.
“Arrestimi i tij u bë pasi, në aksin rrugor Korçë-Maliq, në afërsi të fshatit Vloçisht, ky shtetas duke drejtuar mjetin tip “Benz”, ka aksidentuar me pasojë vdekje shtetasin S.Sh, 70 vjeç dhe bashkëshorten e tij shtetasen V.Sh, 60 vjeçe, banues në fshatin Voskop, kalimtarë në rrugë”, informon policia.
Paraprakisht policia dyshon se drejtuesi i mjetit Sotir Nikolla, ka qenë tej normave të lejuara të shpejtësisë. Megjithatë dyshohet se edhe errësira në rrugë ka ndikuar si shkak për aksidentin.
