47-vjeçari Saimir Taullau mbeti i plagosur mbrëmjen e sotme pas një atentati me armë në lokalin e tij. Dyshohet se pjesëmarrës në atentatin ndaj tij kanë qenë dy persona por kjo nuk është konfirmuar ende.
Saimir Taullau është vëllai i Baki Taullaut, i cili është vrarë në vitin 2005 nga anëtarët e bandës së Aldo Bares (Alfred Shkurtit).
Sipas dëshmisë së Saimir Taullaut, i vëllai Bakiu, ishte gjobitur disa herë nga anëtarët e bandës së Aldo Bares në vite duke u paguar atyre miliona lekë.
Herën e fundit, Baki Taullaut i është kërkuar një shumë prej 500 mijë eurosh për një tokë të blerë në Tiranë ose dokumentet e tokës së blerë, por kësaj here ai kishte refuzuar që ta paguante shumën e kërkuar.
50-vjeçari Taullau u ekzekutua prej Leonard Priftit, i njohur si çibuku, anëtari hershëm i bandës së Aldo Bares dhe një nga ekzekutorët e famshëm të saj.
Prifti e ekzekutoi Taullaun ditën e zgjedhjeve, teksa ai ishte në shesh ku njerëzit po festonin për fitoren e PD-së në zgjedhje. Pas ekzekutimit të Taullaut, djemtë dhe familjarët e tij e kanë ndjekur Priftin duke e vrarë pas pak minutash.
Atentati i sotëm dyshohet se është bërë nga persona që kanë lidhje me anëtarët e bandës së Aldo Bares. Saimir Taullau dyshohet se ka lidhje me Lart Haxhiun, një kundërshtar i Aldo Bares dhe miqve të tij.
Haxhiu para dy vitesh plagosi me armë nipin e Bares, Xhulio Shkurtin ndërsa një vit më vonë, në tetor 2017 në përpjekje për të eliminuar sërish Xhulio Shkurtin, vrau dy shokët e tij, Jurgen Hoxhën dhe Zamir Latifin.
Taullau, i cili mbeti i plagosur sot, dyshohet se ka ndihmuar Laert Haxhiun në atentatin e fundit dhe se ka qenë bashkëpunëtor i tij. Atentati i sotëm mesa duket ka lidhje me përplasjet e nisura që në vitin 1997 dhe që vijojnë të prodhojnë ende viktima në Lushnjë. /Hashtag.al
