Ushtria e Shteteve të Bashkuara të Amerikës ka deklaruar se ka kryer sulme “vetëmbrojtëse” në jug të Iranit, ndërsa vijojnë negociatat për një marrëveshje që synon përfundimin e luftës dhe rihapjen e Ngushticës së Hormuzit, përcjell Euronews.
Sipas Komandës Qendrore Amerikane, CENTCOM, objektivat e goditura përfshinin baza raketore dhe mjete iraniane që dyshohet se po vendosnin mina detare.
Zëdhënësi i CENTCOM-it, Timothy Hawkins, tha se sulmet u kryen “për të mbrojtur trupat amerikane nga kërcënimet e forcave iraniane”, duke shtuar se ushtria amerikane po vepron me “përmbajtje” gjatë armëpushimit në zhvillim.
Sulmet vijnë në një moment kur po diskutohen kushtet e një marrëveshjeje të mundshme mes Uashingtonit dhe Teheranit, e cila do të çonte edhe në rihapjen e Ngushticës së Hormuzit, korridor strategjik përmes të cilit kalon rreth 20% e tregtisë globale detare të energjisë.
Presidenti amerikan Donald Trump deklaroi se negociatat “po ecin mirë”, ndërsa shtoi se marrëveshja është “negociuar në masë të madhe”, megjithëse më vonë kërkoi që përfaqësuesit amerikanë të mos nxitojnë drejt finalizimit të saj.
Nga ana tjetër, zyrtarët iranianë pranuan se është arritur progres në disa çështje, por theksuan se ende nuk ka një afat të përcaktuar për përfundimin e marrëveshjes.
Trump deklaroi gjithashtu se çdo marrëveshje për përfundimin e luftës duhet të përfshijë zgjerimin e Marrëveshjeve Abraham, duke kërkuar që vende si Arabia Saudite, Katari, Pakistani, Turqia, Egjipti dhe Jordania të normalizojnë marrëdhëniet me Izraelin.
Marrëveshjet Abraham, të ndërmjetësuara nga SHBA gjatë mandatit të parë të Trumpit, synojnë forcimin e bashkëpunimit diplomatik, ekonomik dhe të sigurisë mes Izraelit dhe vendeve arabe.
