Parada ushtarake që Kina organizon një herë në dhjetë vjet për të shënuar përfundimin e Luftës së Dytë Botërore shfaqi një gamë të gjerë armësh të reja – përfshirë, për herë të parë, mjete të mëdha autonome detare.
Shumë sisteme ishin të etiketuara qartë, të cilat shërbyen edhe si një mesazh që Kina dëshiron t’i tregojë gjithë botës rritjen e saj si fuqi ushtarake dhe teknologjike.
Modelet e reja të raketave me përmasa të mëdha kanë rreze më të gjatë veprimi, ndërsa sisteme të tjera ofronin mënyra më ekonomike për të neutralizuar sulmet me dronë.
Gjithashtu u ekspozuan armë autonome, përfshirë një robot në formë qeni mbi një automjet, duke treguar përparimin e Kinës në zhvillimin e sistemeve pa pilot në ajër, tokë dhe madje edhe nën ujë.
Disa nga sistemet që tërhoqën më shumë vëmendje në paradë ishin:
DF-5C
Një shtesë e dukshme në ekspozimin e Forcës Raketa të Ushtrisë Popullore Çlirimtare ishte DF-5C, një variant i raketës balistike ndërkontinentale që ka hyrë në shërbim që nga vitet 1970.
Agjencia zyrtare Xinhua tha se ajo ka një “rreze goditjeje globale”, megjithëse nuk është e qartë se si ndryshon nga DF-5B, që tashmë kishte rreze ndërkontinentale.
Diametri i madh i raketës sugjeron një ngarkesë të rëndë, masa kundërpërgjigjeje shtesë ose veçori të tjera që rrisin peshën.
DF-61
DF-61, një model krejtësisht i ri, u prezantua për herë të parë dhe përmasat e tij sugjerojnë se është një raketë balistike ndërkontinentale.
Në vitet e fundit, inteligjenca amerikane ka raportuar se Kina ka eksperimentuar me një sistem bombardimi orbital fraksional – një teknologji e periudhës së Luftës së Ftohtë që vendos një kokë bërthamore në orbitë të pjesshme, për ta dërguar më pas drejt një objektivi.
Nuk është e qartë nëse DF-61 lidhet me këtë program, por struktura e tij e rëndë mund ta mbështesë këtë funksion.
JL-3
Raketa më e re balistike e lëshuar nga nëndetëset, JL-3, i jep flotës bërthamore nënujore të Kinës aftësinë për të goditur objektiva të largët – përfshirë SHBA – nga zona të sigurta, larg brigjeve të saj.
Ky zhvillim i jep Kinës një triadë bërthamore të besueshme, që përfshin ICBM-të, raketa dhe bomba ajrore dhe raketa të lëshuara nga nëndetëset, duke siguruar një kapacitet të dytë goditjeje në rast të një konflikti bërthamor.
YJ-21
YJ-21 është një raketë balistike hipersonike kundër-anijesh, e projektuar për të goditur objektiva të rëndësishëm detarë, si aeroplanmbajtëset.
Kjo raketë, që arrin shpejtësi supersonike dhe ka një rreze veprimi mbi 600 km, tashmë është testuar nga një shkatërrues i Marinës së PLA dhe është parë e integruar edhe në bombarduesit H-6, duke treguar fleksibilitetin e saj.
YJ-17
YJ-17 është një tjetër raketë hipersonike kundër-anijesh që mund të udhëtojë mbi 1.100 km me shpejtësi shumë herë më të madhe se ajo e zërit.
Mendohet se është një “waverider”, një raketë që shfrytëzon valët goditëse për të rritur fuqinë e saj.
Nëse instalohet në anijet kineze, kjo raketë mund të paraqesë rreziqe të reja për aeroplanmbajtëset amerikane edhe përtej zonave tradicionale të kontrollit kinez.
Armë me energji të drejtuar
Kamioni LY-1 mbante një armë të madhe me energji të drejtuar, me shumë gjasa një sistem lazer.
Këto armë konsiderohen thelbësore në mbrojtjen kundër dronëve dhe kërcënimeve të tjera të nivelit të ulët, pasi janë shumë më ekonomike për përdorim se raketat ose artileria me radar.
HQ-29
Kina prezantoi gjithashtu HQ-29, të projektuar për të interceptuar raketa armike në hapësirë.
Detajet për aftësitë e saj janë të pakta, por përmasat e mëdha sugjerojnë një rreze të jashtëzakonshme.
Sisteme të ngjashme në Perëndim përfshijnë SM-3 Block IIA, që mund të lëshohet nga toka ose anijet, por nuk është i lëvizshëm me kamion, si HQ-29.
AJX002
AJX002 duket të jetë një dron nënujor i ri dhe më i madh, që mund të përdoret për zbulim, mbledhje informacioni ose për misione sulmuese, si vendosja e minave nënujore.
Anija luftarake pa ekuipazh
Një anije e vogël luftarake, pa shenja identifikuese, dukej e projektuar për të funksionuar me ose pa ekuipazh dhe kishte veçori të padukshme, si antena të fshehura, për ta bërë më të vështirë zbulimin e saj.
Qentë robotikë
Një element që tërhoqi vëmendjen ishte një grup qenësh robotikë, që tregojnë përqafimin e teknologjisë dhe ambicien e Kinës për një “luftë të inteligjentizuar”.
Këta robotë katërkëmbësh mund të përdoren për zbulim, mbikëqyrje, transport ngarkesash dhe madje edhe në luftime, nëse armatosen.
Edhe pse nuk është e qartë shkalla e autonomisë së tyre, në të ardhmen Kina mund t’i përdorë këta robotë në misione të pavarura.
VINI RE: Ky material është pronësi intelektuale e Bloomberg
