Një kompani teknologjike amerikane, Astronomer, ka njoftuar se drejtori i saj ekzekutiv, Andy Byron, ka dhënë dorëheqjen pasi u përfshi në një video që u bë virale, ku shihej duke përqafuar një kolege gjatë një koncerti të grupit Coldplay.
Ngjarja ndodhi në një arenë në Foxborough, Massachusetts, ku një ekran i madh kapte një burrë dhe një grua që përqafoheshin, e më pas u përpoqën të fshiheshin nga kamera. Sipas mediave amerikane, personat në video janë identifikuar si Andy Byron dhe Kristin Cabot, drejtore për burimet njerëzore në të njëjtën kompani. BBC nuk ka arritur të konfirmojë në mënyrë të pavarur identitetin e tyre.
Në një deklaratë zyrtare, kompania tha: “Andy Byron ka paraqitur dorëheqjen dhe Bordi i Drejtorëve e ka pranuar atë.” Kompania shtoi se është e përkushtuar ndaj vlerave dhe kulturës së saj, dhe se drejtuesit priten të jenë shembull në sjellje dhe përgjegjësi — standarde që sipas saj nuk u respektuan së fundmi.
Klipi, i cili mori miliona shikime, u bë virale kur këngëtari i Coldplay, Chris Martin, komentoi me humor gjatë koncertit: “Ose janë në një lidhje sekrete, ose janë shumë të turpshëm.”
Pas publikimit të videos, Astronomer nisi një hetim të brendshëm dhe e vendosi Byron në leje administrative, përpara se ai të dorëhiqej zyrtarisht. Ndërkohë, drejtori i produktit do të vijojë detyrën si CEO i përkohshëm derisa të gjendet një pasues.
