Deputetja e Partisë Demokratike, Jorida Tabaku, ka reaguar ndaj deklaratave të kryeministrit Edi Rama, duke e akuzuar atë se po përpiqet të shmangë përgjegjësinë për problemet ekonomike përmes “vetëviktimizimit” dhe krijimit të narrativave për armiq të brendshëm e të jashtëm.
Tabaku deklaroi se nuk ekziston një “agresion i organizuar politik apo ekonomik” ndaj Shqipërisë, por sipas saj, pakënaqësia qytetare lidhet me një sistem qeverisës që favorizon një pakicë dhe rëndon shumicën.
“Kryeministrit i ka mbetur vetëm vetëviktimizimi dhe sajimi i armiqve të brendshëm e të jashtëm, për të ndërtuar alibinë e dështimit të tij”, u shpreh Tabaku.
Deputetja demokrate solli në vëmendje situatën ekonomike të familjeve shqiptare, duke deklaruar se vështirësitë janë të dukshme në jetën e përditshme të qytetarëve. Ajo theksoi veçanërisht gjendjen e pensionistëve, duke pretenduar se 27% e tyre konsiderohen të varfër sipas standardeve kombëtare dhe ndërkombëtare.
Sipas Tabakut, edhe sektori i turizmit, i cili është kthyer në një nga shtyllat kryesore të ekonomisë shqiptare, përballet me rreziqe për shkak të korrupsionit, informalitetit dhe mungesës së një vizioni afatgjatë.
“Dështimi ekonomik nuk fshihet dot pas propagandës. Ai është në tryezën gjithnjë e më të varfër të familjeve shqiptare”, deklaroi ajo.
Tabaku akuzoi qeverinë se ka krijuar një sistem që, sipas saj, po dëmton ekonominë dhe po nxit largimin e shqiptarëve nga vendi.
“Gjithçka tjetër është propagandë e vjetër dhe një përpjekje e dëshpëruar për të mbajtur në këmbë karakatinën e pushtetit. Koha është për ndryshim”, përfundoi deputetja e PD-së.
