Kabineti i Izraelit miratoi të dielën një plan për të ndërtuar një kompleks mbrojtës në vendin e ndërtesave të shembura së fundmi të Agjencisë së Ndihmës dhe Punëve të Kombeve të Bashkuara në Jerusalemin Lindor.
Në janar, Izraeli shkatërroi strukturat brenda kompleksit të agjencisë së OKB-së për refugjatët palestinezë në Jerusalemin Lindor, pasi e pushtoi atë vend vitin e kaluar, në një akt të dënuar nga agjencia si shkelje të së drejtës ndërkombëtare.
Në një deklaratë të përbashkët, Ministria e Mbrojtjes dhe Bashkia e Jerusalemit thanë se kompleksi i ri do të përfshijë krijimin e një muzeu ushtarak, një zyre rekrutimi dhe një zyre të ministrit të mbrojtjes.
Ministri i Mbrojtjes, Israel Katz, e quajti vendimin një vendim të “sovranitetit, sionizmit dhe sigurisë”.
UNRWA, të cilën autoritetet izraelite e akuzojnë për paragjykim, nuk e kishte përdorur ndërtesën që nga fillimi i vitit të kaluar, pasi Izraeli urdhëroi që të lironte të gjitha ambientet e saj dhe të ndërpriste veprimtarinë e saj, shkruan Reuters.
Një zëdhënës i UNRWA-së nuk pranoi të komentojë mbi planin izraelit.
Agjencia vepron në Jerusalemin Lindor, të cilin OKB-ja dhe shumica e vendeve e konsiderojnë territor të pushtuar nga Izraeli, pasi u pushtua nga Jordania në luftën e Lindjes së Mesme të vitit 1967. Izraeli e konsideron të gjithë Jerusalemin si kryeqytetin e tij të pandashëm.
UNRWA operon gjithashtu në Gaza, Bregun Perëndimor dhe gjetkë në Lindjen e Mesme, duke ofruar shkollim, kujdes shëndetësor, shërbime sociale dhe strehim për miliona palestinezë.
