Kryeministri izraelit Netanyahu zhvilloi fshehurazi një vizitë në Emiratet e Bashkuara Arabe gjatë luftës me Iranin dhe u takua me presidentin e Emirateve, Sheikh Mohammed bin Zayed Al Nahyan, njoftoi të mërkurën zyra e tij.
Sipas zyrës së Netanyahu-t, vizita çoi në “një përparim historik” në marrëdhëniet mes Izraelit dhe Emirateve të Bashkuara Arabe. Nuk u dhanë menjëherë hollësi të tjera.
Më herët të mërkurën, The Wall Street Journal raportoi se edhe shefi i Mossad-it, David Barnea, kishte vizituar Emiratet gjatë luftës për të ndihmuar në koordinimin e operacioneve ushtarake. Dy zyrtarë dhe një person tjetër i njohur me çështjen i thanë gazetës se Barnea vizitoi Emiratet të paktën dy herë për koordinim të lidhur me luftën.
Gazeta e përshkroi këtë si një shenjë të forcimit të partneritetit mes Jerusalemit dhe Abu Dhabit. Sipas burimeve, Barnea zhvilloi vizita sekrete në shtetin e Gjirit në të paktën dy raste të ndara, në mars dhe prill.
Sipas raportit, të dy vendet mbajtën koordinim të ngushtë të sigurisë gjatë gjithë luftës. Ambasadori amerikan Mike Huckabee konfirmoi se Izraeli dërgoi sisteme Iron Dome dhe dhjetëra personel ushtarak në Emiratet e Bashkuara Arabe për t’i operuar ato dhe për të mbrojtur vendin nga sulmet iraniane.
Vetë Emiratet e Bashkuara Arabe gjithashtu goditën objektiva në Iran gjatë luftës, sipas raportimeve, përfshirë edhe një rafineri, shkruan Ynet.
