Anija turistike e goditur nga një shpërthim vdekjeprurës i hantavirusit mbërriti herët të dielën pranë Portit të Granadillës në Tenerife, treguan pamjet e Reuters, ku do të ankorohet për evakuimin e pasagjerëve dhe një pjese të ekuipazhit.
Pasagjerët, asnjëri prej të cilëve nuk ka shfaqur shenja infeksioni, do të testohen nga autoritetet shëndetësore spanjolle për t’u siguruar që ata mbeten asimptomatikë dhe më pas do të transportohen në tokë me varka të vogla, sipas zyrtarëve spanjollë.
Autobusë të mbyllur do t’i çojnë pasagjerët në aeroportin kryesor të ishullit spanjoll rreth 10 minuta larg, ku do të hipin në aeroplanë që shkojnë në vendet e tyre përkatëse, shkruan Reuters.
Të gjithë pasagjerët në anijen luksoze turistike MV Hondius konsiderohen kontakte me rrezik të lartë si masë paraprake, tha agjencia evropiane e shëndetit publik vonë të shtunën, si pjesë e këshillave të saj të shpejta shkencore.
Evakuimi pritet të fillojë midis orës 7:30 dhe 8:30 të mëngjesit (06:30-07:00 GMT), sipas autoriteteve spanjolle.
Shtetasit spanjollë do të zbarkojnë të parët, ndërsa kombësitë e tjera do të vijnë në grupe, thanë zyrtarët qeveritarë të shtunën . Tridhjetë anëtarë të ekuipazhit do të qëndrojnë në bord dhe do të lundrojnë drejt Holandës, ku anija do të dezinfektohet.
