Pas përjashtimit të saj nga gara për kryetare të Partisë Demokratike, Evi Kokalari ka reaguar me një deklaratë të gjatë në rrjetet sociale, ku ka hedhur akuza të ashpra ndaj procesit zgjedhor dhe drejtuesve të partisë.
Ajo ka pretenduar se nuk është skualifikuar ligjërisht nga gara dhe se vendimet e marra brenda partisë, sipas saj, janë të paligjshme dhe në kundërshtim me statutin. Kokalari ka theksuar se ish-kryeministri Sali Berisha nuk ka të drejtë të udhëheqë apo të ndikojë procesin zgjedhor, duke e cilësuar situatën brenda PD-së si të padrejtë dhe të kontrolluar nga një grup i vogël drejtuesish.
Në deklaratën e saj, ajo ka akuzuar drejtues të ndryshëm të partisë për, siç i quan ajo, abuzim me pushtetin brenda strukturave të PD-së, ndërsa ka përsëritur se ka qenë kundër korrupsionit politik brenda saj.
Kokalari ka deklaruar gjithashtu se do të vijojë betejën e saj politike dhe institucionale për atë që e cilëson “rikthim të meritokracisë dhe transparencës” në parti, duke paralajmëruar se çështja do të ndiqet edhe në rrugë ligjore.
Reagimi i saj vjen në një moment tensioni të shtuar brenda Partisë Demokratike, teksa procesi i brendshëm për drejtimin e saj ka shkaktuar përplasje dhe reagime të ndryshme nga figurat politike të përfshira.
