Reforma në onkologji, Ministrja Evis Sala në Kuvend deklaron se decentralizimi po afron shërbimin te pacienti
Në një interpelancë të mbajtur sot në Kuvend, Ministrja e Shëndetësisë Evis Sala paraqiti hapat e reformës në sistemin onkologjik, duke vënë theksin te decentralizimi i shërbimeve dhe largimi nga modeli i vjetër i përqendrimit në një pikë të vetme.
Sipas ministres, koha kur të gjithë pacientët duhej të udhëtonin drejt Tiranës po merr fund, pasi sistemi po organizohet në disa nivele për të qenë më pranë qytetarëve në spitalet rajonale.
Gjatë fjalës së saj, Sala bëri të ditur se përveç QSUT-së, shërbimi onkologjik tashmë ofrohet edhe në spitalin “Shefqet Ndroqi” dhe “Mbretëresha Geraldinë”.
Ajo shpjegoi se ky ndryshim ishte i domosdoshëm pasi mbingarkesa e mëparshme krijonte vonesa të pafalshme për jetën.
“Problemi nuk ishte vetëm mungesa e burimeve, por edhe mënyra e organizimit të sistemit”, u shpreh ajo para deputetëve, duke shtuar se synimi mbetet që pacienti të mos endet në kërkim të mjekimit.
“Qëllimi është që pacienti të mos endet në sistem, por sistemi të organizohet rreth pacientit”, deklaroi ministrja Sala, duke njoftuar se rrjeti i njësive të kimioterapisë do të zgjerohet me një qendër të re në Fier, duke e çuar në nëntë numrin total të tyre në shkallë vendi.
Ajo vuri në dukje se vetëm gjatë vitit 2025 janë trajtuar mbi 21 mijë pacientë në Spitalin Ditor Onkologjik pranë QSUT-së, shifër që tregon volumin e madh të punës që po përballon stafi mjekësor.
Një pikë kyçe e prezantimit ishte rritja e buxhetit për barnat, i cili për vitin 2026 arrin në 19.5 miliardë lekë. Ministrja garantoi se aktualisht nuk ka mungesa në QSUT dhe se bashkëpunimi me Institutin Kombëtar të Tumoreve të Milanos ka mundësuar miratimin e 38 protokolleve të reja të trajtimit.
Për sa i përket teknologjisë, ajo përmendi instalimin e një akseleratori të tretë në radioterapi dhe planet për pajisjen me PET CT në bashkëpunim me Agjencinë Ndërkombëtare të Energjisë Atomike.
Në fund të fjalës së saj, ministrja pranoi se megjithëse sistemi ka ende vend për përmirësim, rritja e mbijetesës mesatare nga 33% në 52% është një tregues i qartë i progresit.
Ajo paralajmëroi krijimin e Institutit Kombëtar të Tumoreve si një strukturë që do të unifikojë trajtimet onkologjike në të gjithë Shqipërinë. “Në qendër të këtij transformimi nuk është politika, por pacienti”, përfundoi Sala, duke garantuar vijimin e investimeve për një sistem më të aksesueshëm.
