Kryeministri i Greqisë Mitsotakis shpalli sot një paketë masash mbështetëse prej 500 milionë eurosh të financuar nga një suficit buxhetor më i madh se sa pritej, ndërsa qeveria kërkon të lehtësojë presionin mbi familjet që përballen me kosto të larta jetese.
Njoftimi erdhi pasi auroritetet raportuan se Greqia regjistroi një suficit primar buxhetor prej 12.13 miliardë eurosh në vitin 2025, i barabartë me rreth 4.9% të produktit të brendshëm bruto. Shifra i jep qeverisë hapësirë shtesë fiskale për masa lehtësuese të synuara.
Mitsotakis i përshkroi rezultatet fiskale si “shumë inkurajuese” por pranoi se kushtet ekonomike globale vazhdojnë të rëndojnë buxhetet familjare.
“Ekonomia kombëtare po qëndron dhe po ecën më mirë se sa pritej,” tha ai.
“Megjithatë, ankthi i supermarketit, kostoja e rritjes së fëmijëve, çmimet më të larta të karburantit dhe kujdesi për të moshuarit mbeten – kudo në Evropë dhe në vendin tonë gjithashtu.”
Ai shtoi se “çdo sukses kolektiv duhet gradualisht të përkthehet në mirëqenie individuale,” duke e quajtur paketën e re një “dividend progresi të kthyer nga shteti te shoqëria.”
Masat përfshijnë zgjatjen e subvencioneve për naftën me 20 cent për litër për muajin maj dhe vazhdimin e subvencioneve për plehrat kimike deri në gusht, duke mbuluar 15% të kostove të blerjes.
Familjet me fëmijë do marrin një pagesë emergjente prej 150 euro për fëmijë në fund të qershorit, e paguar automatikisht pa aplikim. Masa do të mbulojë gati 1 milion familje, që përfaqësojnë rreth 80% të familjeve me fëmijë.
Mbështetja për grupet vulnerabël po rritet gjithashtu. Pensionistët me të ardhura të ulëta, të moshuarit e pasiguruar dhe personat me aftësi të kufizuara do të marrin 300 euro në vit, të paguara çdo nëntor në mënyrë të përhershme. Programi do të zgjerohet në 1.9 milion përfitues, ose 85% e pensionistëve mbi 65 vjeç.
Masa të tjera përfshijnë kufij më të lartë të të ardhurave për rimbursimet e qirasë, lehtësimin e kushteve për heqjen e sekuestrimeve të llogarive bankare pasi të jetë shlyer 25% e një borxhi, dhe zgjerimin e të drejtës për mekanizmin e zgjidhjes jashtë gjykatës së borxheve për borxhe midis 5,000 dhe 10,000 euro, duke prekur rreth 300,000 persona.
Borxhet e prapambetura deri në dhjetor 2023 do të jenë gjithashtu të pranueshme për shlyerje në deri në 72 këste, me kusht që borxhet më të reja të jenë shlyer ose të rregulluara.
“Ky është një suficit që erdhi si rezultat i një politike ekonomike të kujdesshme,” tha Mitsotakis, duke përmendur uljen e shpenzimeve publike, përpjekjet kundër evazionit fiskal dhe masat për të mbështetur rritjen ndërsa ulen taksat dhe borxhi publik.
Ai theksoi se ndërhyrjet janë projektuar për të ruajtur stabilitetin fiskal. “Këto ndërhyrje i drejtohen shumicës, pa vënë kurrë në pikëpyetje balancën fiskale,” tha ai, duke shtuar se ato shërbejnë si një “mburojë” kundër presioneve të vazhdueshme ekonomike.
