Një sulm me armë zjarri ndodhi në orët e para të së hënës në një lagje rezidenciale të Filadelfias, ku tre persona mbetën të vrarë dhe dhjetë të tjerë u plagosën, njoftuan autoritetet lokale për AP.
Komisioneri i Policisë, Kevin Bethel, deklaroi se tre viktimat ishin të rritur, ndërsa dy nga të plagosurit janë të mitur. Sulmi ndodhi pak para orës 1 të mëngjesit në zonën Grays Ferry.
“Skena ishte e mbushur me qindra predha. U qëllua shumë në këtë bllok banimi,” tha Bethel.
Një person i armatosur është ndaluar dhe ndodhet në paraburgim, ndërsa ende nuk dihen motivet e ngjarjes.
Bethel shtoi se policia kishte ndërhyrë në të njëjtin bllok edhe një natë më parë, ku kishte realizuar disa arrestime.
“Ky është një akt i turpshëm, sjellje e ulët prej njerëzish që duan të duken si gangsterë,” tha ai.
Ngjarja ndodhi pas disa episodeve të tjera me armë gjatë fundjavës së 4 Korrikut në SHBA, përfshirë edhe një tjetër incident ku të paktën tetë persona u plagosën pranë një klubi nate po në Filadelfia.
