Një autobus i mbipopulluar pasagjerësh ka rrëshqitur nga një shkëmb në Sri Lanka, duke vrarë 21 persona dhe duke plagosur të paktën 24 të tjerë.
Aksidenti, ndër më vdekjeprurësit e regjistruar në Sri Lanka për dekada, ndodhi në orët e para të së dielës në një zonë malore pranë qytetit Kotmale, rreth 100 kilometra në lindje të kryeqytetit Colombo, shkruan Daily Mail.
Autobusi shtetëror po transportonte rreth 70 udhëtarë, rreth 20 më shumë se kapaciteti i tij, kur shoferi humbi kontrollin dhe doli nga rruga para agimit, tha policia.
“Ne po përpiqemi të përcaktojmë nëse ishte një defekt mekanik ose nëse shoferi e zuri gjumi në timon,” tha një zyrtar i policisë lokale, duke folur në kushte anonimiteti.
Zëvendësministrja e Transportit Prasanna Gunasena shpjegoi në vendngjarje se të plagosurit u dërguan me urgjencë në dy spitalet e zonës. Raportet kanë pohuar se autobusi po transportonte dhjetëra pelegrinë budistë.
Një i mbijetuar i tha një gazetari lokal se ai kishte qenë në pjesën e përparme të autobusit dhe ishte me fat që kishte shpëtuar vetëm me lëndime të lehta.
“Autobusi ishte i kthyer në anën e majtë dhe ndërsa shoferi po fliste, ai humbi kontrollin dhe ra në greminë”, tha burri i paidentifikuar.
Aksidentet vdekjeprurëse të autobusëve janë të zakonshme në Sri Lanka, veçanërisht në rajonet malore, shpesh për shkak të drejtimit të pakujdesshëm dhe rrugëve të ngushta dhe të mirëmbajtura keq.
