Në kërkim të rikthimit pas humbjes së partisë në zgjedhje ndaj Donald Trump në zgjedhjet presidenciale të nëntorit, Komiteti Kombëtar Demokrat të shtunën zgjodhi Ken Martin, kreun e demoratëve në Minesota, si kryetar të ri.
Martin do ngarkohet të ndryshojë fatin e një Partie Demokratike të lodhur dhe të demoralizuar, që jo vetëm humbi kontrollin e Shtëpisë së Bardhë nëntorin e kaluar, por nuk arriti të fitojë asnjërën nga dhomat e Kongresit.
Që atëherë, partia pa timon ka hasur vështirësi për t’iu përgjigjur breshërisë së urdhrave ekzekutivë të republikanit Trump, shumë prej të cilave përmbysën politikat e ish-presidentit demokrat Joe Biden.
Si një strateg demokrat prej një kohe të gjatë në Minesota, Martin u hodh në veprim disa orë pas zgjedhjes së tij, duke kritikuar planet e Trump për të vendosur tarifa gjithëpërfshirëse kundër Meksikës, Kanadasë dhe Kinës, çka sipas tij është një mënyrë e sigurt për të rritur çmimet për amerikanët e lodhur nga inflacioni.
“Trump nuk do t’i detyrojë miliarderët e korporatave të paguajnë për këto tarifa. Familjet e thjeshta dhe bizneset e vogla do e kenë në kurriz këtë,” tha ai në një deklaratë pas shpalljes së tarifave të Trump. Martin ka bërë thirrje për rivendosjen dhe shtimin e infrastrukturës kombëtare të partisë në mënyrë që të konkurrojë në garat në gjithë vendin. Ai mundi kryetarin demokrat të Wisconsin, Ben Wikler në votimin e parë.
