Udhëheqësi suprem iranian Ayatollah Ali Khamenei u zotua të hakmerret ndaj Izraelit të martën pas një sulmi ajror që vrau dy nga gjeneralët më të lartë të Iranit dhe pesë këshilltarë të tjerë ushtarakë në Siri.
“Regjimi sionist do të ndëshkohet nga duart e trimave tanë. Ne do ta bëjmë atë të pendohet për këtë krim dhe për të tjerët që ka kryer,” tha ai.
Sulmi i paprecedentë në kompleksin e ambasadës iraniane në Damask nënvizoi rrezikun e përshkallëzimit të mëtejshëm në një konflikt që ka valëzuar Lindjen e Mesme që nga fillimi i luftës në Gaza. Deri më tani, Teherani ka shmangur me kujdes konfliktin e drejtpërdrejtë me Izraelin, ndërsa mbështet aleatët që sulmojnë objektivat izraelite dhe amerikane.
Izraeli nuk ka deklaruar përgjegjësinë për sulmin që shkatërroi një ndërtesë konsullore ngjitur me ndërtesën kryesore të ambasadës në lagjen e pasur “Mezzeh” të Damaskut të hënën mbrëma, duke vrarë shtatë anëtarë të Gardës Revolucionare të Iranit.
Por një zyrtar i lartë i qeverisë izraelite, duke folur për Reuters në kushte anonimiteti, tha se të goditurit “qëndronin pas shumë sulmeve ndaj aseteve izraelite dhe amerikane dhe kishin plane për sulme shtesë”. Ambasada “nuk ishte një objektiv”, tha zyrtari.
