Vatikani tha të hënën në një vendim historik të miratuar nga Papa Françesku se priftërinjtë katolikë romakë mund të bekojnë bashkimet e çifteve të të njëjtit seks për sa kohë që ata nuk janë pjesë e ritualeve ose liturgjive të rregullta të kishës dhe nuk u ngjasojnë martesave.
Një dokument nga zyra doktrinale e Vatikanit, i cili në mënyrë efektive anuloi një deklaratë që i njëjti organ kishte lëshuar në vitin 2021, thoshte se bekime të tilla nuk do legjitimonin situata të parregullta, por do të ishin një shenjë se Zoti i mirëpret të gjithë, shkruan Reuters.
Në asnjë mënyrë nuk duhet të ngatërrohet me sakramentin e martesës heteroseksuale, shtoi vendimi. Ai tha se priftërinjtë duhet të vendosin rast pas rasti dhe “nuk duhet të parandalojnë ose ndalojnë afërsinë e Kishës me njerëzit në çdo situatë në të cilën ata mund të kërkojnë ndihmën e Zotit nëpërmjet një bekimi të thjeshtë”.
Papa la të kuptohet se një ndryshim zyrtar ishte në në lëvizje në tetor në përgjigje të pyetjeve të parashtruara nga pesë kardinalë konservatorë në fillimin e një sinodi peshkopësh në Vatikan.
Ndërsa përgjigja në tetor ishte më e nuancuar, dokumenti me tetë faqe i së hënës, nëntitulli i të cilit është “Mbi kuptimin baritor të bekimeve”, përshkruan situata specifike. Një seksion prej 11 pikash titullohej “Bekimet e çifteve në situata të parregullta dhe të çifteve të të njëjtit seks”. Kisha mëson se tërheqja ndaj të njëjtit seks nuk është mëkatare, por aktet homoseksuale janë.
Që nga zgjedhja e tij në 2013, Françesku është përpjekur ta bëjë Kishën me më shumë se 1.35 miliardë anëtarë më mikpritëse për njerëzit LGBT pa ndryshuar doktrinën morale. At James Martin, një prift i shquar jezuit amerikan që shërben për komunitetin LGBT, e quajti dokumentin “një hap të madh përpara në shërbimin e kishës” për ta.
Në një postim në X, i njohur më parë si Twitter, Martin tha se dokumenti “njeh dëshirën e thellë në shumë çifte katolike të të njëjtit seks për praninë e Zotit në marrëdhëniet e tyre të dashurisë”, duke shtuar se “së bashku me shumë priftërinj, tani do të jem i kënaqur të bekoj miqtë e mi në bashkimet e të njëjtit seks”.
Vendimi i së hënës do kundërshtohet nga konservatorët, të cilët tashmë e kritikuan Papën kur ai bëri komentet e tij fillestare mbi këtë temë në tetor.
Ulrich L. Lehner, një profesor i teologjisë në Universitetin e Notre Dame në Shtetet e Bashkuara, tha se udhëzimi i ri nga zyra doktrinore “fton për keqkuptime dhe do mbjellë konfuzion”. Duke shprehur shqetësimin se disa peshkopë do ta përdorin atë si pretekst për të bërë atë që është e ndaluar në mënyrë eksplicite, profesori shtoi, “është, dhe e urrej ta them, një ftesë për përçarje”.
Dokumenti thoshte se bekimi nuk duhet të lidhet ose të caktohet me një ceremoni martese civile dhe të kryhet me asnjë nga “veshjet, gjestet ose fjalët që janë të përshtatshme për një martesë”. Vende për bekime të tilla, tha ai, mund të jenë “në kontekste të tjera, të tilla si një vizitë në një faltore, një takim me një prift, një lutje e recituar në një grup ose gjatë një pelegrinazhi”.
Vendimi u nënshkrua nga kardinali Victor Manuel Fernandez, kreu i kreut të Dikasterit të Vatikanit për Doktrinën e Besimit dhe u miratua nga Papa në një audiencë private me Fernandez dhe një zyrtar tjetër të zyrës doktrinale të hënën
