Komisioni Evropian ka nisur një veprim ligjor kundër platformës së mediave sociale X, e njohur më parë si Twitter, sipas ligjit për platformat online.
Ekzekutivi tha të hënën se do të hetojë nëse X mund të ketë shkelur rregullat e BE-së “në fusha të lidhura me menaxhimin e rrezikut, moderimin e përmbajtjes, transparencën e reklamave dhe aksesin në të dhëna për studiuesit.”
Ky veprim i KE-së vjen pas një kërkese për informacion dërguar nga Komisioni te X në tetor pasi mori të dhëna se platforma ishte duke ndarë përmbajtje dhe dezinformata të paligjshme, veçanërisht përmbajtje terroriste dhe të dhunshme në lidhje me luftën Izrael-Hamas.
Nëse ekzekutivi gjen prova të mjaftueshme për të vërtetuar shqetësimet e tij dhe nuk arrin të sigurojë angazhime të detyrueshme nga platforma, ai mund ta godasë firmën me një gjobë deri në 6% të xhiros së saj globale, e cila në vitin 2022 do të ishte rreth 264 milionë dollarë.
Që nga gushti i vitit 2023, X, e cila ka 112 milionë përdorues aktivë mujorë në të gjithë bllokun, është një nga 17 platformat e përcaktuara sipas DSA si “platformë shumë e madhe në internet”,” duke e bërë atë subjekt të normave të reja, të rrepta për shpërndarjen e përmbajtjeve të paligjshme, mbrojtjen e të drejtave themelore dhe sigurinë publike.
Musk thuhet se ka konsideruar planet për të dalë nga tregu evropian në reagim ndaj dispozitave të paraqitura nga legjislacioni pionier.
AliExpress dhe TikTok në pronësi kineze, si dhe kompania mëmë e Instagram dhe WhatsApp, Meta, kanë marrë në javët e fundit kërkesa për informacion sipas DSA, por asnjë veprim ligjor nuk është ndërmarrë deri më tani.
“Ne e marrim shumë seriozisht çdo shkelje të rregullave tona. Dhe provat që kemi aktualisht janë të mjaftueshme për të hapur zyrtarisht një procedim ndaj X,” tha Margrethe Vestager, nënkryetare ekzekutive e Komisionit Evropian.
