Gati tre duzina kamionë hynë në Gaza të dielën në autokolonën më të madhe të ndihmave që nga fillimi i luftës midis Izraelit dhe Hamas-it, por punonjësit humanitar thanë se ndihma ishte ende shumë e vogël për nevojat, pasi mijëra njerëz shpërthyen magazinat për të marrë miell dhe produkte bazë të higjienës.
Ministria e Shëndetësisë në Gaza tha se numri i të vdekurve mes palestinezëve kaloi 8,000, kryesisht gra dhe të mitur, ndërsa tanket dhe këmbësoria izraelite ndoqën atë që kryeministri izraelit Benjamin Netanyahu e quajti një ‘fazë të dytë’ në luftën e ndezur nga sulmi i Hamas-it më 7 tetor.
Numri është i paparë në dekadat e dhunës izraelito-palestineze. Mbi 1,400 njerëz kanë vdekur në anën izraelite, kryesisht civilë të vrarë gjatë sulmit fillestar.
Deri tani Izraeli ka lejuar vetëm një rrjedhje ndihme të hyjë. Të dielën, 33 kamionë që transportonin ujë, ushqime dhe barna hynë në pikën e vetme kufitare nga Egjipti, tha për Associated Press një zëdhënës në vendkalimin Rafah, Wael Abo Omar.
Pas vizitës në vendkalimin Rafah, kryeprokurori i Gjykatës Ndërkombëtare Penale e quajti vuajtjen e civilëve ‘të thellë’ dhe tha se ai nuk kishte mundur të hynte në Gaza.
“Këto janë ditët më tragjike”, tha Karim Khan, gjykata e të cilit ka hetuar veprimet e autoriteteve izraelite dhe palestineze që nga viti 2014.
