Presidenti iranian Ebrahim Raisi ka thënë se vendi i tij nuk do ia vërë veshin thirrjes së fundit të SHBA-së ndaj kombeve të tjera që të mos përfshihen në luftën mes Izraelit dhe Hamas-it, duke argumentuar se “krimet e regjimit sionist kanë kaluar vijat e kuqe”.
Në një postim në X të dielën, Raisi paralajmëroi se zhvillimet e fundit në dhe rreth Gazës “mund t’i detyrojnë të gjithë të ndërmarrin veprime”. Ai vuri në dukje se Uashingtoni, ndërsa u kërkon shteteve të tjera të përmbahen, vijon t’i japë “mbështetje të gjerë Izraelit”.
Në një intervistë me Bloomberg TV të premten, ministri i Jashtëm iranian Hossein Amir-Abdollahian paralajmëroi se gjakderdhja e vazhdueshme në Gaza “do bëjë që gjendja të dalë jashtë kontrollit në rajon”.
“Pala amerikane duhet të vendosë, a dëshiron vërtet të përshkallëzojë luftën?” tha diplomati. Ai shtoi se “frontet e reja” që shfaqen kundër Izraelit ishin “të pashmangshme”.
Duke iu drejtuar Asamblesë së Përgjithshme të OKB-së të enjten, Amir-Abdollahian lëshoi paralajmërime të ngjashme, duke thënë se SHBA “nuk do të kurseheshin nga ky zjarr” nëse “gjenocidi” i Izraelit kundër popullit palestinez vijon. Ministri theksoi se “Azia Perëndimore është rajoni ynë”, me Teheranin që “nuk ka asnjë rezervë kur bëhet fjalë për sigurinë e shtëpisë”.
Presidenti i SHBA Joe Biden është zotuar se SHBA do “qëndrojë përgjithmonë” me Izraelin, me Uashingtonin duke ofruar miliarda dollarë ndihmë shtesë për mbrojtjen për aleatin e tij.
SHBA-ja ka vendosur gjithashtu dy grupe aeroplanmbajtëse dhe mjete të tjera detare, një skuadrilje avionësh luftarakë F-16, sisteme të mbrojtjes ajrore dhe 900 trupa në Lindjen e Mesme, duke thënë se kjo prani e shtuar ushtarake duhet të shërbejë si një pengesë për shtetet e tjera të tunduara për t’iu bashkuar përleshjes.
