Numri i të vdekurve palestinezë është rritur në 830 mes sulmeve ajrore izraelite në Rripin e Gazës, tha të martën Ministria e Shëndetësisë, shkruan CNN.
Sipas deklaratës, mbi 4,100 njerëz u plagosën, përfshirë 4,000 në bombardimet izraelite në Gaza.
Një deklaratë e mëparshme e ministrisë tha se numri i të vdekurve ishte 765 palestinezë, duke përfshirë të paktën 143 fëmijë dhe 105 gra.
Izraeli vazhdoi sulmet e tij ajrore në Rripin e Gazës për të tretën ditë të martën, pas një sulmi me shumë fronte të Hamasit në qytetet izraelite pranë territorit bregdetar. Hamasi tha se sulmi ishte në përgjigje të shkeljeve izraelite në kompleksin e xhamisë Al-Aksa në Jerusalemin Lindor të pushtuar dhe rritjes së dhunës së kolonëve, shkruan Anadolu Agency.
Izraeli u kundërpërgjigj me një seri sulmesh ajrore në Rripin e Gazës dhe vendosi një bllokadë totale në territorin, ku banojnë afro 2.3 milionë njerëz.
Ushtria izraelite tha të martën se kishte nisur sulme masive ajrore duke synuar më shumë se 100 objektiva në Gaza. Ushtria tha se forcat e saj vranë katër persona të armatosur palestinezë që kishin tentuar të depërtonin në Izrael pranë Zikim pranë Gazës.
Ushtria tha se ministri i Ekonomisë i Hamasit, Juad Abu Smallah, u vra në një sulm ajror në qytetin Khan Younis në Gaza.
Hamasi, nga ana e tij, konfirmoi të martën se dy zyrtarë të saj u vranë në sulmet izraelite në Gaza. Grupi u hakmor duke lëshuar breshëri raketash në qytetet qendrore të Izraelit, duke përfshirë Ashkelonin, Tel Avivin, Beersheban dhe Rishon LeZion. Lëvizja palestineze tha se lëshoi gjithashtu raketa drejt aeroportit Ben Gurion.
Më shumë se 1,800 njerëz janë vrarë në përshkallëzimin që nga e shtuna, duke përfshirë më shumë se 1,000 izraelitë.
Kryeministri izraelit Benjamin Netanyahu është zotuar se do të përdorë të gjithë forcën e Izraelit për të shkatërruar aftësitë e Hamasit dhe “të hakmerret për këtë ditë të zezë”.
