Presidenti turk Rexhep Tajip Erdogan nuk mbeti i impresionuar nga paleta e ngjyrave të ndezura të përdorura në sallën e mbledhjeve të Asamblesë së Përgjithshme të OKB-së, duke sugjeruar se ajo dukej shumë e ngjashme me flamurin e krenarisë së ylberit LGBTQ.
“Një nga çështjet që më shqetëson më shumë…është se kur hyni në Asamblenë e Përgjithshme të Kombeve të Bashkuara, shihni ngjyrat LGBT në shkallë dhe vende të tjera,” u tha Erdogan gazetarëve në Shtëpinë Turke në Nju Jork të premten, siç citohet nga gazeta Duvar.
“Sa njerëz LGBT ka në botë për momentin? Sado të drejtë të kenë në këto hapa, po aq të drejtë kanë edhe ata kundër LGBT-së”, tha lideri turk. Ai shtoi se do dëshironte të fliste me Sekretarin e Përgjithshëm të OKB-së Antonio Guterres për praninë e ngjyrave, duke theksuar se ‘kjo është një çështje humanitare dhe ne duhet të dimë se ka njerëz që shqetësohen nga kjo’.
Erdogan me sa duket po i referohej 17 ngjyrave të ndryshme që simbolizojnë Objektivat e Zhvillimit të Qëndrueshëm të OKB-së (SDG), të cilat përdoren si dekorime në muret dhe shkallët e sallës së Asamblesë së Përgjithshme.
Erdogan, i cili u rizgjodh për një mandat të tretë në maj, sulmoi shpesh komunitetin LGBTQ gjatë fjalimeve të fushatës, ndërsa u paraqit si një mbrojtës i vendosur i vlerave tradicionale familjare.
Marrëdhëniet e së njëjtës gjini nuk janë të paligjshme në Turqi, megjithëse vitet e fundit autoritetet në mënyrë efektive po godasin simbolet dhe temat LGBTQ. Mbyllja e organizatave LGBTQ ishte një pjesë e platformës së fushatës zgjedhore të Erdoganit.
